Utoqqaat siku pillugu ilisimasaat tammatsaalineqassapput
Carltonip universitetiani Ottawamiittumi ilisimatuut paasissutissanik katersinerminni ukiuni kingullerni qulingiluani utoqqarnik 100-nik suleqateqarsimapput. Pilersaarut nunaqarfinnit pingasunit ukuusunit; Pannertooq, Kinngaat kiisalu Illulimmit peqataaffigineqarpoq.
Utoqqaat pilersaarummut peqataasimanertik nuannaarutigeqaat tassami taakku oqarnerattut ”namminneq atuinermisuulli siku ullumikkut inuusuttunit atorneruussimammat, inuusuttullu ilisimasaat utoqqaat ilisimasaannit annikinnerujussuullutik”.
Aammattaaq utoqqaat ilisimasaminnik ingerlatitseqqissinnaanertik nuannaarutigisorujussuuat ingammik silap allanngooriartornerata sikuusarnera allanngortissimammagu.
Paasissutissat utoqqarniit tunniussuunneqartut nunalerusiarineqarput taaguuteqartinneqartumik sikuatlas; tassanilu siku, sikullu pissusaat angallannikkullu ingerlaarfiit siku qulaallugu pisartut takuneqarsinnaapput. Nunalerut internetimi takuneqarsinnaavoq taassanilu sammerusutamik toqqaagaanni sumiiffiit/piffiillu atiinik utoqqaat taaguisut tusarnaarneqarsinnaapput.
Nunalerut siku-atlas maanna Nunavummi atuarfinni atorneqartussanngorpoq taamaalillutik utoqqaat ilisimasaat tammatsaalineqqassapput. Taanna www.sikuatlas.ca-mi aaneqarsinnaavoq.
