Danmarkimi misissuisoqarmat utoqqaat inuusuttunit nuannaarnerusartut paasineqarpoq. Utoqqaat kiinnatik eqisalukkaluartut, pualanerulaaraluarlutik isarussatillu silinnerulaaraluartut nuannaarnerupput. 75-t 79-illu akornanni ukiullit inuusuttunit aporfissakinnerusartut, nutaarsiassaqartitsivik Nyhedsavisen allaaserinnippoq.
Utoqqaat inuusuttunit annilaangannginnerupput, aliatsattarneri akuttunerusarput niaqorlunnginnerusarlutillu, utoqqaat aamma inuusuttunut naleqqiullutik tarnimikkut nappaatikinnerusarput.
Inuit 31.500-t misissuinermi peqataammata tamanna paasineqarpoq.
- Inuit eqqarsartaasaat timitulli nungullariartorneq ajorpoq. Utoqqaliartortilluta tarnikkut mattuneruleriartortarpugut. Piginnaanerput taanna inuunitsinni inerisartuartarparput, Århus Amtiani peqqissutsimut siunnersorti, Finn Breinholt, misissueqataasoq oqarpoq.