Utoqqaat kaattalernissaat ernummatigineqarpoq

Alaskami piniarnermut malittarisassat allanngortinniarneqarnerat naggueqatigiit siuttuisa ernummatigaat.

Pisassat nammineq pisarisinnaanngisat allanut pisarisassanngortittarnerinut malittarisassat allanngortinniarneqarput. Utoqqarnik innarluutilinnillu piniussisarnerit taama allannguinermi innarlerneqassapput.

Piniariaaserli atornerlunneqartarsimasoq, Alaskami illoqarfiit pingaarnersaanni, Anchoragemi, aviisimi Anchorage Daily Newsimi atuarneqarsinnaavoq.

Utoqqarnik innarluutilinnillu piniussisinnaanermut uppernarsaammik atsiortitseriarlutik piniussisut pisatik namminneq pisarsimagaat allaaserineqarpoq.

Naggueqatigiit siuttuisa piniussissarnerup pingaaruteqarnera erseqqissaatigaat.

Siuttut ilaata Gordon Carlsonip piniussisarunnaarneq utoqqaat ukioq manna kaattalernissaannik kinguneqassangatippaa.

Malittarisassat allanngornerat tuttut tuttorpaallu piniarneqartarnerinik allannguinerussasoq, aviisimi atuarneqarsinnaavoq.