Utoqqaat inuiaqatigiinni akuunerulersinniarneqarput

Rosa Marie Elsner, Nuummi Utoqqaat Illuata ningiua Kommuneqarfik Sermersuumit angalalerpoq innuttaasunik ataatsimiititsisaqattaalerluni.

- Paasineqarsimagami nunani avannarpasissuni inuusuttorpassuit illoqarfeeqqat qimattaleraat, taavalu uteqqinngisaannarlutik. Immaqa ilinniarsimapput arlannulluunniit nutsersimapput, taava qimataasarput utoqqarpassuit, utoqqaat pisinnaasut aamma utoqqaat ikiortariaqartut, taavalu assassaarullutik inuusuttut assai ikilimmata.

EU-minngaanniit suliakkiissut Kommuneqarfik Sermersuup kisimiilluni ingerlappaa?

- Aap, imaakkami uagut akuerigatsigu taava oqarpugut, Kommuneqarfik Sermersuup iluani suliakkiissut taanna misileqqaassavarput, taava atorsinnaappat nunatsinni illoqarfiit, kommuneqarfiit allat aamma atorsinnaassavaat, uagutsitut iliorlutik.

Innuttaasunik ataatsimiititsigaangavit paasissutissat katersortarpatit apeqqutit amerlasuut aggersunut apeqqutigisarakkit, taakkua qanoq atorniarpigit?

Utoqqaat sukkut peqataasinaanersut paaserusukkakkit, suna suliarerusussinnaaneraat. Aamma qanoq isumaqarnersut, ikioqataarusuppat? Immaqaluunniit qanoq utoqqalererusuppat?

Uppernarsisinneqarsimassaaq utoqqaat ikiliartortut inuusuttut ikiliartortut?

Aap, massakkkut utoqqartarvut utoqqalisorujussuupput, taavalu amerlanerit peqqillutik. Ukiorpassuit peqqillutik inooqataapput. Taava inuiaqatigiit akornanni ikiuinissaq pisariaqartilerparput.

Taama oqarpoq Rosa Marie Elsner, Nuummi Utoqqaat Illuata ningiua.

Rosa Marie Elsner aqagu Arsuliarluni aallassaaq aggustusillu 12-aani innuttaasunik ataatsimiititsissaaq aqaguanilu unnukkut Paamiuni ataatsimiititsissalluni.

Judith Juthu Peilmann ilanngutassiamik suliarinnippoq.