Utoqqaat internetimut attaveqanngitsut MitID-qalernissartik ajornartorsiutigisaraat
NemID atorunnaartoq MitId-mik taarserneqarmat nunatsinni utoqqaat amerlasuut nalorsaramik MitID-qalersimanngitsut, Nunatsinni Utoqqaat Illersuisoqarfiata misissuinermini paasivaa.
KNR-illu paasivaa, kommunini tallimaasuni ataasiinnaq MitID-mik atuisunngortitsisinnaanngorsimasoq.
Utoqqaat interneteqanngitsut ajornartorsiornersaapput
MitID utoqqarnut interneteqanngitsunut internetimillu atuisinnaanngitsunut paatsiveerusimaartitsivoq. Tamanna
Utoqqaat Illersuisuata allattoqarfiata Aasianni, Ilulissani Qaqortumi Nuummilu utoqqaat peqatigiiffiinut paasiniaanermini paasivaa:
- Assersuutigiinnarlugu Aasianni peqatigiiffimmi 35-nik ilaasortaqarsimapput, marluinnaat MitID-imik atuisunngorsimapput.
Utoqqaat illersuisuat Inga Egede taama oqarpoq.
Qaqortumi utoqqaat peqatigiiffiani siulittaasup Stina Lundbladip MitID aamma nalorsaatigaa.
- Kisimiikkaangama uanga nalusarpara, soorlu nuussiniassaguma bankimut ikiorneqanngikkuma naluara. Soorlumigooq oorersivugut ilaa? Taava periaraluaraangama oqartarput - tassuunaatigut nuussissaatit - kisianni nalunartarami. Taamaasilluni nuanniilliornartarami. Stina Lundblad taama oqaluttuarpoq.
Kommunit innuttaasunik sullissinerminnik pimoorussinerusariaqartut, utoqqaat illersuisuat Inga Egede isumaqarpoq:
- Taamaattumik pisortat kommunit tuaviornerpaamik suleqatigilllutik taanna ajornartorsiut qaangernissaa sulissutigisariaqarpaat.
Kommunit atuisunngortitsisarnissamut suli utaqqisut
Nunatsinni kommunini tallimaasuni Kommuneqarfik Sermersooq kisiartaaalluni MitID-imik atuisunngortitsisarnissamut akuerisaavoq.
Qeqqata kommuniata sapaatit akunnerani uani MitID-mik atuisinnaanngortitsinissamut akuerineqarnissaa ilimanartoq, innuttaasullu 10 procentiisa suli MitID-qanngitsut decembarip qiteqqunnerani MitId-taarnissaat ilimanartoq, sulisuinut pisortaq Hans Christian Sværd allappoq.
Avannaata Kommuniata januaarip qiteqqunnerani tamanna pissarsiarisagaaa, aningaasarnermut pisortaanerugallartoq Karl Kristian Kristoffersen allappoq.
Kommuneqarfik Sermersooq kommunini kisiartaalluni MitID-qalersitsisinnaanissamut akuerisaavoq.
Kommunit allat assigiinngitsunik peqquteqartumik suli akuersissuteqanngillat.
Kommune Qeqertallip qaqugu akuerisaanissaa aningaasaqarnermut pisortaap Nicolai Odgaard Jensenip suli naluaa.
Kommune Kujalleq paasissutissanik aamma utaqqivoq. MitID-mik atuisunngortitsisarnissaanut suleriaasissat maanna nutarsarneqartut akuerisaanissaminnullu sivisujunnaartoq, allattoqarfimmi pisortaq Max Heilmann Larsen allappoq. Kommune Kujallermi innuttaasut 13 procentii suli MitID-taarsimanngillat.
Qeqqata Kommuniata sulisussaaleqigami akuersissutitaarnissaq naammassinaveeqqagaa, Pisortaanerup sulisuinut pisortaq Hans Christian Sværd allappoq.
Avannaata Kommuniani kinguaattoornermut pingaartumik nunaqarfittaminni kinaassutsimik uppernarsaatinik atorsinnaasunik amigaateqarneq peqqutaasoq, aningaasaqarnermut pisortaq Karl Kristian Kristoffersen allappoq.