Utoqqaat illuat Nuummi sulisussaaleqivoq

Nunatsinni suliffitsialaap toqqarneqarnissaanut Suliffigissaasut ukiut tallimassaa kingumut unammisitseqqilerput.

Siorna suliffitsialattut toqqarneqartut ilaat Nuummi

utoqqaat illuat, ullumikkorpiarlu inisimasut ilaat 90-nik ukioqalerluni inuissiortup, suliffitsialattut toqqarneqareernerup kingorna suliffittut ingerlalluaraluarluni sulisussaaleqisalerlutik utoqqaat illuata ningiuata Rosa Marie Elsnerip oqaatigaa. Sulisut arlallit siornali soraartalersimapput, peqqissaasut sisamat sundhedassistentillu aamma sisamat kiisalu ikiortit sundheds aamma socialehjælperit qulingiluat ullumikkut amigaataapput, tamanna inissaaleqinermik peqquteqartoq Rosa Marie Elsnerip oqaatigaa.

- Social og Sundhedshjælperit eqqaassagaanni sineriammiit pikkorissut maanga suliartortaraluarput, qaammatilli pingasut qaangiukkaangata inissaaleqilertarput, aallarfimminullu utertariaqartarput, utoqqaallu illuanni amigaataalersarput.

Rosa Marie Elsnerip aamma maluginiarpaa Nuummi inissaaleqineq pissutaalluni suliffippassuit sulisoqarnikkut ajornartorsiuteqartut. Sulisussaaleqinerlu utoqqaat illuani malunnarsimmat suliffimmi ajornartorsiutaalerpoq, pissutigalugu ulloq unnuarlu ullut arfineq-marluk suliffiummat, sulisunik amigaateqarneq erloqinarnerarpaa, utoqqaat paarisariaqartaramik.

Nuummi utoqqaat illuata ningiua Rosa Marie Elsnerip ilaangullugu oqaatigaa utoqqaat 46-t najugaqartut, sulisullu 80-t missaaniittut pisariaqartinneqarlutik.

Suliffitsialattut siorna toqqarneqartut ilagaat

Polar rejer kiisalu pinngortitaleriffik.

Suliffigissaasut suliffitsialammik toqqaasarnerminni toqqammavagigajuppaat suliffiit atugaasa minnerunngitsumillu suliffinni sillimaniarnerup pitsaalluinnarnissaa.

Ukioq-manna suliffistialammik toqqaanissami siunnersuutit kingusinnerpaamik novembarip aallaqqaataani siunnersuutigineqareersimassapput.