Utoqqaat ernumapput
-Uuliamut akit qaffannerisi assut malugisimavarput, oqimaalaarpoq assut tamanna ingammik utoqqalinersiaqartilluni. Margrethe Lange 68-inik ukioqartoq, taanna uini Nanortalimi namminneq illuminni najugaqatigivaa. Illuminnut, kiassarnermut innaallagissamullu qaammammut 4800 koruuneertarput, aningaasallu sinneruttut naammattusaarlutik atortarpaat.
- Isumaqarpunga utoqqaalluni akit taamatut qaffakkiartuinnassappata utoqqarmut peqqinnanngilaq aamma eqqarsarnarpoq. Taamatut artukkerneqakattaaginnarluni. Margrethe Lange taamatut oqarpoq.
Alla aamma akit qaffanneqarnerinut malugisaqartoq tassaavoq 81-inik ukiulik Agnete Nielsen Narsami nammineq illumini najugaqartoq, taanna soraarnerussutissiaminit akiligassat tamakkerlugit akilereeraagamigit 3-4.000 koruunit missaanni aningaasaateqartarpoq.
Agnete Nielsenip akit qaffakkiartorneri imatut malugivai:
- Tassa nammineq illoqarpunga, ukiamut upernariaanullu uuliamik assut atuiguma akisoqaaq, taassumap saniatigut inaallagissamullu akiligassat, suna tamarmi qullaraluttuinnartoq erloqinartaqaaq. Erloqinaqaaq. Aamma angalaniarnermullu akit annertutigisut, tamakku tamaasa ataatsimut isigissagaanni utoqqaat atugarliorput, Agnethe Nielsen taama oqarpoq.
Aasianni soraarnerussutissialik Magnus Therkeldsenip akit qaffakkiartornerat aamma malugivaa. Taanna illumini nuliilu najugaqarpoq, taanna manna ikummatissap akiata qaffannerata kingunerisaanik 200 koruunit tungaanut qaammammut akiliinerusalereerpoq, ikummatissamullu atuinerat minnerulissanngilaq.
- Ukioru atuineq annertunerulissaqaaq, ukioru nillertillualerpat uuliamik atuinerput annertunerugaatsialissaqaaq.
Magnus Therkelsen apersorneqarluni taama oqarpoq, taanna Utoqqaat kattuffianni siulittaasuuvoq, ilaasortaniillu akit qaffakkiartornerat pillugu saaffigineqartareerpoq.
