Utertuugassaniit 88,3 millionit koruunit akiligassanut nakkartinneqartut
Kikkut tamarmik ukioq manna akileraarutiminniit utertuunngillat. Utertuugassat 27,3 procentii innuttaasut pisortanut akiitsuinut nakkartinneqarnissaannut Akileraartarnermut aqutsisoqarfimmiit immikkoortinneqarsimapput.
88,3 millionit koruunit Akileraartarnermik aqutsisoqarfiup pisortaqarfinnut nakkartussanngortippai.
- Siullertut, innuttaasut pisortanut akiitsui 1,5 milliardit koruunit sinneraat ajortoq isumaqataaffigaara, aqutsisoqarfimmi pisortaq, Kim Neumann Nielsen, Akileraartarnermut Aqutsisoqarfimmiit oqarpoq.
Naatsumik oqaatigalugu restancit tassaapput akiitsut akiligassalluunniit akilerneqanngitsut. Nunatta karsianut tunngatillugu, innuttaasut pisortanut 1,5 milliardit koruuninik akiitsoqarnerat, KNR-imiit sapaatip akunnera kingulleq allaaserineqarpoq.
Akileraartarnermut Aqutsisoqarfik naapertorlugu akileraarutitigut akiitsut taama amerlatiginerannut pissutaasoq pingaarneq tassaavoq, innuttaasut amerlavallaartut ukiumi naatsorsuusiorfiusumi tulliuttumut tunngatillugu siumoortumik akileraarutinik nalunaarsuiaartannginnerat. Taakku saniatigut eqqortumik nalunaarsuineq ajortut aamma amerlapput, tamannalu ukiumi tulliuttumi akileraaruteqaqqinnissamik kinguneqarsinnaavoq.
Suliffeqarfiit namminersortut naatsorsuutitigut malinnaanngitsut
Kim Neumann Nielsen KNR-imut oqarpoq, suliffeqarfiit namminersortut affaasa missaat naatsorsuutitik Akileraartarnermut Aqutsisoqarfimmit tunniunneq ajoraat.
- Suliffeqarfiup sinneqartoorutissatut naatsorsuutai Akileraartarnermut Aqutsisoqarfimmiit eqqoriaalluta inissittariaqartarpagut. Ullumikkut suliffeqarfiit namminersortut 50 procentiisa missaat nammineerlutik nalunaarsuiffissamik nassiussinerminni suliffeqarfiup naatsorsuutaannik Akileraartarnermut Aqutsisoqarfimmut nassiussineq ajorput, Kim Neumann Nielsen oqarpoq.
Tassa Akileraartarnermut Aqutsisoqarfiup suliffeqarfiup sinneqartoorutai eqqoriartariaqarpai, Akileraartarnermut Aqutsisoqarfimmiilli eqqoriaaneq naapertuutinngippat, suliffeqarfik akiitsoqalersinnaavoq.
Taamaattumik Akileraartarnermut Aqutsisoqarfiup pisortanut akiitsuminnik akiliisinnaassuseqartut isiginiarnerusarpai.
Meeqqanut akilersuutit akiitsullu qaffakkiartortut
Meeqqanut tapit akilerneqanngitsut ukiorpassuarni qaffakkiartorput. Akileraartarnermut Aqutsisoqarfik kommunit sinnerlugit meeqqanut akilersuutinut tunngatillugu akiliisitsiniaasartoq, Kim Neumann Nielsen oqarpoq.
- Innuttaasut amerlasuut akiitsut akilernissaannut isertitakippallaartarput, akiitsullu arlalitsigut nutaanngitsuupput qaffakkiartuinnarlutillu, taanna oqarpoq.
Kim Neumann Nielsenip aamma erseqqissarpaa, inuttaasut arlallit isertitaatik aallaavigalugit akiitsunik akiliisinnaanngitsorpassusut. Aamma oqarpoq inuttut aningaasaqarnerup naammaginartumik atugassaqartitsinissaa,Akileraartarnermut Aqutsisoqarfimmiit tamatigut qulakkeerniarneqartartoq, nalunngilaali inuppassuit Akileraartarnermut Aqutsisoqarfiup saaffiginninnerinut qisuariarneq ajortut.
