Utertoortussanngorput

Islandimi internetikkut aningaaseriviup Icesavep nakkaattoornerata kingorna atuisut aningaasaataasa utertinnissaannut qulakkeerinninnissamut inatsit Altingimi Islandimi inatsisartunit amerlanerussuteqarluartunit ippassaq akuerineqarpoq.
februaarip 17-at 2011 07:27

Islandimiut ingerlataat aningaaserivik Icesave 2008-mi oktobarimi nakkaattoormat, aningaaserivimmik atuisorpassuarnut Tuluit Nunaata Hollandillu qulakkeerinninnermikkut akiliutigisatik utertinniarmatigik, ukiut marlussuit isumaqatigiinniareerlutik utertitat matussusernissaat inatsisartut ippassaq tassa akuersissutigaat.

Aningaasat utertinnissaannut aaqqissuussineq siulleq islandimiut siorna taasissutigimmassuk 93 procentit itigartippaat.

Isumaqatigiinniaqqinnikkut erniat 5,5 procentimiit 3 procentimut appartinneqareermata inatsisartut ulluni arlalinni oqallisigeriarlugu isumaqatigiissut ippassaq akuersaarpaat.

Inatsisissatut siunnersuutigineqartoq islandimiut 30.000-it internetikkut itigarteqqugaluaraat, inatsisartut amerlanerussuteqarluartut ippassaq akuersaareermassuk, præsidentip Ólafur Ragnar Grimsonip atsiussagaa ilimagineqarpoq.

Taamaalilluni aningaaseriviup 2008-mi nakkaattoornerata kingornagut Islandip torersaanera ingerlaqqissinnaalerpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq