Uternissaminut utaqqisinnaanngingajappoq

Pitsaasumik angusaqarfiusumillu sulissagaanni Danmarkimi nunatsinnilu oqartussat aappariittut ikioqatigiittarnissaat pingaartuunerarpaa.

- Suleqatigiinnermi aappariinnertulli ikioqatigiilluni anguniagaqarluni ilungersorlunilu sulisoqassaaq. Ataqatigiinneq angusaqarnissarlu sulinissanni pingaartippakka, Naalagaaffiup sinniisortaava apriilip aallaqqaataani nunatsinni sulilersussaq Michaela Engell oqarpoq.

Naalagaaffiup sinniisua Naalagaaffiup aallartitaraa, taassuma Namminersorlutik Oqartussat Naalagaaffiullu aallartitai suleqatigisarpai. Aallartitap aamma Inatsisartuni ataatsimiinnerit malinnaaffigisarpai, Kunngikkormiut nunatsinnut tikeraarnissaat pilersaarusioqataaffigisarlugit nunatsinnilu Folketingimut ilaasortassanik qinersisoqassatillugu suleqataasarpoq.

- Nunanut allanut tunngassuteqartut sulininni soqutigisaraakka aamma taakkua Naalagaaffiup sinniisoqarfiani sulileruma aallukkumaarpakka, Michaela Engell oqarpoq.

Taassuma Kalaallit Nunaanut tunngasut atorfeqarnermini isumagisarai. Nunatsinni ukiut katillugit 23-t najugaqarsimagami uternissaminut qilanaarpoq.

- Københavnip Universitetiani ilinniareerlunga Kalaallit Nunaanni sulilerpunga. Namminersornerullutik Oqartussani nunanut allanut pisortaqarfimmi pisortaanikuugama pissutsit nalunngilluarpakka, Michaela Engell oqarpoq.

Naalagaaffiup sinniisortaava nunatsinnut angerlarnissaminut utaqqisinnaanngingajappoq.

- Kalaallit Nunaat uummatinni initoqaaq. Inuit pinngortitarlu nuannareqaakka, taamaammat angerlarnissata qilanaareqaara, Michaela Engell oqarpoq.