Utaqqisuuteqarneq inuiaqatigiinnut sunniuteqarnerluttarpoq
Tamannalu inuiaqatigiinnut annertuumik sunniuteqarnerluppoq, taama Torben Andersen aningaasarsiornermut ilisimatooq Århus universitetimi atorfilik naliliivoq.
Kommuneqarfik Sermersuup misissueqqissaartitsinerani paasinarsivoq meeqqerivinni inissat 20 procentii atorneqanngitsut, ilutigitillugulu meeqqerivinnut utaqqisut 200-nngorsimallutik.
- Akileraarutit inuiaqatigiinnut tuttussaagaluit, ilinniarsimasullu suliffeqarfinni amigaataasut annaaneqartarput.
Minnerunngitsumillu angerlarsimasariaqartoq aningaasarsiassaraluaminik annaasaqartarpoq. Tamannalu atorluaanerunngilaq, Torben Andersen oqarpoq.
Meeqqat namminersorlutik paaqqinnittartuniittut meeqqerivinni ilikkagassaraluatik pissarsiarinngitsoortarpaat.
- Meeqqat meeqqerivinniinnissaat nunanit allani ilisimatusarnikkut ilisimalikkat aallaavigalugit pingaaruteqarluinnartoq paasineqarnikuuvoq, meeqqat meeraqatimik inersimasullu meeqqanik sullissinissaminnut ilinniarsimasut akornaniikkunik inuiaqatigiinnut akuliunnissartik ajornannginnerutilersarpaat, kiisalu atuartunngornissaminnut ilisimariigassatik meeqqerivinni pissarsiarisarlugit, Torben Andersen naliliivoq.
Meerarpassuit meeqqerivinniilernissamut utaqqinerisa kinguneraa, meeqqanik paaqqinnittartoqarmat nalunaarsorneqanngitsumik inatsisaatsuliortunillu. Meeqqat taamaattuniinnerat inuiaqatigiinnut aamma pitsaanngitsumik sunniuteqarpoq.
- Naleqquttuunngilaq inuiaqatigiinnut annerusumik akileraarutitigut iluaqutaanngitsumik ingerlagamik, minnerunngitsumillu meeqqat qanoq atugassaqartinneqarnersut ilisimaneqartanngimmat, Torben Andersen naggasiivoq.
