Utaqqisut suli amerlapput

Pinerluuteqarsimasut eqqartuunneqarnerminnit isertitsisarfimmiitinneqarnissaannut utaqqititsisarneq sivitsoraluttuinnarpoq, tassami qaammatit 16-it 19-illu akornanni utaqqisoqartarpoq.

Aasap ingerlanerani pinerluuteqarsimasunut inissiisarfik nutaaq Sisimiuni atulersinneqarpoq, kisianni tamanna utaqqisarnermut sivikinnerulersitsisimanngilaq, pinerluuteqarsimasunut isertitsisarfiit pisortaat Michael Stage oqarpoq.

Pinerluuteqarsimasunut isertitsisarfimmik 20-nik inissalimmik ammaanitsigut utaqqisut amerliartorunnaarnissaat neriuutigisimagaluarparput, kisianni utaqqisut ikiliartunngitsut takusinnaavarput.

Massakkut utaqqineq qaammatit 16-it 18-illu akornanni sivisussuseqartarpoq, tassa eqqartuussinerup naammassineraniit naatsorsorlugu.

- Pineqaatissiinerit qanoq ittut utaqqisuni siullinngortinneqartarpat?

Tassa nalinginnaasumik aallaavigineqartarpoq pinerluuteqarneq inoqatinut ulorianartorsiortitsisuunersoq. Soorlu assersuutigalugu pinerluuteqarsimasoq sivisunerusumik tigummigallarneqarsimappat, eqqartuussivimmit naliliisoqartarpoq tigummigallarneqartoq ingerlaannartumik pinerluuteqarsimasunut isertitsisarfimmut nuunneqartariaqarnersoq.

Taamatut utaqqisorpassuaqarnera ajoraluarpoq, tassami taama sivisutigisumik utaqqititsinikkut eqqartuussinerup pinerloqqinnginnissamut sunniutaa minnerulertarmat. Aamma pitsaanngilaq inuit pinerluuteqarnerup kingorna ingerlalluartumik inuuneqalereersut pinerluuteqarsimasunut isertitsivimmiitinneqartussanngortarmata, pinerluuteqarsimasunut isertitsisarfiit pisortaat Michael Stage oqarpoq.

Nunatsinni pinerluuteqarsimasunut isertitsiviit tallimaasut 123-nut inissaqarput. Massakkullu utaqqisut 239-upput.