Utaqqisut akisussaassusilimmik pisigik!

- Utaqqisorpassuaqarnera qangalili atugaraarput, taannalu immikkut aaqqinneqartariaqarpoq. Inuiaqatigiinni kiffartuussisussaatitaanermik pineqaatissinneqarsimasut inissaqarput, 30-t pallillugit inissaqartinneqarmata. Taamaammat taakku atorluarneqartariaqarput inatsimmi tamanna allassimammat, Pinerluttunik Isumaginnittoqarfimmi pisortaasimasoq Elisæus Kreutzmann oqarpoq.

Taanna Eqqartuussiveqarneq pillugu ataatsimiititaliarsuarmi ilaasortaanermigut inuiaqatigiinni kiffaartuussisussaatitaanerup atorneqarnerusariaqarnissaa taamani ilaatigut innersuussutigaa.

Pinerlussimasunik inuiaqatigiinni kiffartuussisussanngorlugit pineqatissiisarneq, Kalaallit Nunaanni eqqartuussivinnit atugaanerusariaqartoq, Pinerluttunik Isumaginnittoqarfimmi maanna pisortap, Thomas Nicolajsenip Radioaviisimut sapaatip akunnera kingulleq oqaatigaa.

- Pinerlussimasut inuiaqatigiinni kiffartuussisussanngortinneqartarneri Pinerluttunik Isumaginnittoqarfimmit atugaraarput. Suliffeqarfinnillu 30-nik isumaqatigiissuteqarpugut, soorlu utoqqaat illuini, timersortarfinni qatserisartoqarfinni allanilu. Neriuutigisimagaluarparpullu eqqartuunneqartut inuiaqatigiinni kiffartuussinissaminnik pineqaatissinneqartut amerlanerusinnaaneri, tassami tamanna piareersimaffigigatsigu, Pinerluttunik Isumaginnittoqarfimmi pisortaq Thomas Nicolajsen taamanikkut oqarpoq.

Akisussaaffiullu Danmarkimiinneranik Nunatsinni qinikkat ilaasa oqartarnerat, Elisæus Kreutzmannip aamma apeqquserpaa:

- Naalagaaffiup ukiorpassuarni tigumminninnera eqqarsaatigalugu soorlulusooq politikerinit ilaatigut isiginiarneqartoq "taakku akisussaaffigigamikku taakku siulliullutik isumaginiarlissuk."

- Isumaqarpunga eqqarsartariaaseq taanna qimattariaqaleripput, Nunatsimmi annertuumik aamma pisussaaffeqaratta, Elisæus Kreutzmann oqarpoq.

Inissinneqarnissaminnut utaqqisut tamarmik inuiaqatigiinni kiffartuussinissamik pineqaatissinneqarnissaminnut soorunami piukkunnanngitsut, Elisæus Kreutzmannip oqaatigaa, pineqaatissinneqarsimasullu inuiaqatigiinni kiffartuussisinnaanersut pillugu naliliisarnerit aaqqissugaanerusariaqartut ujartorlugu.

- Eqqartuussivinni illersuisussaatitaasut aammalu eqqartuussivik namminneq oqarsinnaapput: Uani inuup taassuma eqqartuunneqarnissaanut atorfissaqartikkatsigu atugarisai misissorniarsigit, inuiaqatigiinni kiffartuussinissamut piukkunnarnersoq takusinnaaniassagatsigu. Pissutsit tamakku assigiinngitsut maluginiarpakka oqallisigineqarsimaneri amigaataasut, taamaasillunilu equngasoqarpoq pinngitsoorani, Pinerluttunik Isumaginnittoqarfimmi siulittaasuusimasoq Elisæus Kreutzmanna oqarpoq.

Pineqaatissinneqarsimasut inissiisarfiini inissinneqarnissaminnut utaqqisut ullumikkut 296-iupput.