Utaqqisariaqarpoq aningaasassaaleqisoqarmat

apriilip 10-at 2006 13:09

Imigassamik ikiaroornartumillu atornerluisuunini pissutigalugu Aqqalu Møller Rafaelsen, Qaqiffimmi katsorsartikkumalluni kommuniminut ukioq manna februaarimi saaffiginnippoq, paasilluguli Qaqiffimmi katsorsartinnissaminut piffissami sivisuumi utaqqisariaqassalluni, kommunip najugaqarfigisaata aningaasaatai killeqarmata. Taama utaqqisariaqalernini pillugu Aqqalu Møller Rafaelsen ima oqarpoq:

- Ukioq kingullerli Qaqiffinnissara eqqarsaatigilernikuuara, kisiannili saaffiginninnissannut inuttut piareersaqqaarsimallunga. Aalajangernissannut nukippaalussuit atornikuuakka.

Aalajangerami kommunimut saaffiginnissimavoq ukioq manna februaarimi.

- Kisianni qanittukkut Qaqiffimmukarnissannik neriorsorneqanngilanga, utaqqisuninngooq ulikkaarnera pissutigalugu.

Ukioq ataaseq sinnerlugu utaqqisinnaalluni paasigamiuk Aqqalu Møller Rafaelsen assut eqqarsaammersimanerarpoq.

- Eqqarsaammerpunga assaa, taama utaqqitiginiaruma assaa sivisuallaarluni.

Utaqqinermi nalaani AA-rtartunut orniguttarsinnaanissamut neqeroorfigineqarsimavoq, illoqarfigisaminilu ilaqutariinnut katsorsaasoqarmat aamma ilaasimalluni. Tamatuma kingorna peqataaqatinilu isumaqatigiissimapput naapittarumallutik kisianni:

- Isumaqarpunga naammaginanngitsoq, utaqqerujussuarnermi allamut aamma saatsitseriaannaagami.

- Qinikkat tapersiinissaat pisariaqarsorigaluarpara, taava aamma taanna; pilersugallit salliutinneqarnerat aamma taanna apeqqusilaartariaqartoq isumaqarpunga, uagut pilersugaqanngitsut inuugatta allatuulli. Allatuulli pineqarnissarput aamma kissaatiginaraluaqaaq. Aqqalu Møller Rafaelsen oqarpoq.