Utaqqiissaasumik inigisanut akiliuteqartarnissaq pillugu isumaqatiginniarusupput
Kattuffiit siulittaasui Namminersorlutik Oqartussat isumaqatiginniartartuinik tatiginnikkunnaarlutik sisamanngormat nalunaarput. Inigisamut akiliutigineqartalersussatut kvadratmeterimut ataatsimut ukiumut 580 koruunit Kattuffinnut siunnersuutigineqartut, Namminersorlutik Oqartussat isumaqatiginniartartuisa pisortaata Palle Frederiksenip nalunaarutaa kattuffinnit isornartorsiorneqarpoq. Akiliutigineqartussatut siunnersuutigineqartoq sivikitsumik atorfeqartinneqartut ullumikkut akilitigisartagaattut annertutigivoq. Kattuffiit isornartorsiuteqarlutik oqaaseqarnerat Namminersorlutik Oqartussat isumaqatiginniartartut pisortaanit Palle Frederiksenimit isumaqatigineqanngilaq, taanna oqarluni ataatsimiinneq isumaqatiginninniarnertut naatsorsuutigineqassanngitsoq tusarniaanerusorli oqarluni.
Tusarniaaneq pisarpoq inatsisiliortoqartinnagu. Isumaqatiginniarnermi suliaq ingerlanneqartutut Sivso Dorphimit suli isigineqarpoq. Palle Frederiksenip ippassaani tusarniaanertut taallugu oqarnera Sivso Dorphimit tupigineqarpoq. Utaqqisaasumik ineqarnermut akiliuteqartarnissaq pillugu isumaqatiginiarnerit marlunngormat aallartinneqarput. Ineqarnermut inatsit malillugu utaqqiisaasumik ineqarmut ullumikkut akiliisitsisoqarsinnaanngilaq, tamannalu aatsaat anguneqarsinnaavoq Namminersorlutik Oqartussat Kattuuffillu isumaqatigiissuteqarpata, Sivso Dorph oqarpoq.
Utaqqiisaasumik Ineqarnermut akiliuteqartalernissaq anguneqarsinnaavoq isumaqatigiissusiortoqarnikkut imaluunniit inatsisiliornikkut, Sivso Dorphilu isumaqarput maannakkut inatsisitigut akuleruttoqartariaqanngitsoq isumaqatiginniarnerit ingerlanneqartillugit.
Palle Frederiksenip isumaqatiginniarnerit suli ingerlanneqartut avammut nalunaaruteqarnera Sivso Dorphimit eqqumiiigineqarpoq, kissaatigalugulugu isumaqatiginniarnerit eqqissilluni ingerlanneqartariaqartut.
