Utaqqiisaasumik inigisamut akiliutissatut siunnersuut
Namminersorlutik oqartussani atorfillit utaqqiisaasumik inigisallit kvadratmeterimut ataatsimut 580 krouuninik ukiumut akiliisalernissaat siunnersuutigineqarluni kattuffinnut ippassaq saqqummiunneqarpoq.
Akiliutissatut siunnersuutigineqartoq taartaallutik suliartortartunut ullumi atuutsinneqareersoq, isumaqatigiinniarnermut pisortaq Palle Frederiksen ilisimatitsivoq.
Akiliut kvadratmeterimut ataatsimut ukiumut 580 koruuninik annertussusilik erngumut, kiassarnermut innaallagissamullu atuinermut matussusiisarpoq. Akiliutigineqartalersussatut siunnersuut atuutilissappat, taava utaqqiisaasumik inigisamut 120 kvadratmeterisut angissuseqartumut qaammammut 5.800 koruuninik akiliisoqartalissaaq. Nuummi utaqqiisaasumik inigineqartartut ukiumut 190-it 200-illu missaani amerlassuseqartarput.
- Utaqqiisaasumik inigisaqartitsisarneq Nuummi ajornartorsiutaanerusarpoq, tassami tamaani inissaaleqisoqarmat. Atorfimmut atatillugu inigititassat Tuapannguaniittut atorneqaleriarpata utaqqiisaasumik inigisaqartartut ikilinissaat naatsorsuutigaarput. Napasuliami siullermi inissiat 70-it missaaniipput, Palle Frederiksen oqarpoq.
Utaqqiisaasumik inigisamut akiliuteqartalernerup atuutilerneratigut ukiumut 4 millioni koruuninik isertitaqartalernissaq naalakkersuisunit naatsorsuutigineqartoq, 2010-mut aningaasanut inatsisissatut siunnersuummi takuneqarsinnaavoq.
Namminersorlutik oqartussat siunnersuutaat kattuffinnit akuerineqassappat, taava Radioaviisimi naatsorsuinerit takutippaat isertitarineqarsinnaasut amerlanerussasut.
Utaqqiisaasumik inigisamut akiliuteqartalernissaq siullermik 2005-imi siunnersuutigineqaraluarpoq itigartitsissutigineqarlunili. Akiliuteqartalernissarlu pillugu qaaammatip tulliani ataatsimiittoqaqqissaaq.
