Utaqqiisaasumik ineqarneq akeqanngikkallassaaq
Kattuffiit Namminersorlutillu Oqartussat ataatsimoorlutik tusagassiuutinut taama nalunaaruteqarput.
2010-mut Aningaasanut Inatsimmi, utaqqiisaasumik ineqartunik akiliuteqartitsisalernermit 4 millionit koruunit Nunatta karsianut isertinneqartussatut missingersuusiorneqaraluarput. Namminersorlutik Oqartussat kattuffiillu taamatut akiliuteqartitsalernissaq pillugu januaarimi isumaqatigiinniarput.
Maannali utaqqiisaasumik ineqartut akiliuteqartalernissaat ilimanarunnaannguatsiarpoq.
Nuummi Tuapannguani inissialiat ukiup tulliata ingerlanerani sulisunut inissiatut atorneqarsinnaalersussaammata, Namminersorlutik Oqartussanit isumaqartoqarpoq, utaqqiisaasumik inissiisarnermik pisariaqartitsineq minnerulissasoq.
Tamatumunnga peqatigitillugu Namminersorlutik Oqartussat piffissami sivikitsumi sulisorineqartunut taartaasunullu, ingerlatsinermut akiliuteqartitsisalernissaq eqqunniarpaat, taamaalilluni taama aaqqissuussineq kattuffinnut tamanut atuutsilersillugu, naak tamanna maannamut peqqinnissamik sullissisunut kisimi atuussimagaluartoq.
- Ataatsimut isigalugu 4 millionit koruunit missiliorlugit tamanna ileqqaarutaassaaq, taakkulu utaqqiisaasumik ineqarnermut akiliuteqartitsisalernikkut isertinniarneqaraluartut amerlaqatigaat, Aqutsisoqarfimmi pisortaq Peter Hansen Radiuaviisimut oqarpoq.
Utaqqiisaasumik inissiisarnermut akiliuteqartalernissap qanoq ittuussagaluarnersup atuutsilersinneqarsinnaanera pillugu isummertoqannginnerani ineriartornerup utaqqimaaqqaarneqarnissaa, ukiarulu naliliiffigineqarnissaa kattuffiit aamma Namminersorlutik Oqartussat maanna isumaqatigiissutigaat.