Utaqqiisaa inigititat inissianik nutaanik 17-inik naleqarput

Namminersorlutik Oqartussat sulisumik atorfininerannut atatillugu utaqqiisaasumik ineqartinerannut, prævakantinut vakantinullu, siorna 35,5 millioni koruunit atorpaat. Aningaasaqarnermut Sulisoqarnermullu Aqutsisoqarfimmit naatsorsuinerit inaarnerisa tamanna takutippaat.

Ilaqutariinnut inissiamik ataatsimik sananeq 2 millioni koruunit missaannik akeqarsinnaasoq, Kommuneqarfik Sermersuumi tusarfigut oqarput.

Tassalu inissiat Namminersorlutik Oqartussat sulisumik utaqqiisaa ineqartinnerannut aningaasat atugaat inissianut nutaanut 17-inut atorneqarsinnaagaluarput.

KNR-imiit sisamangornermi ualikkut Nuummi aqqusinerni apersukkatta inissianik sanaartornissaq kissaatiginerpaavat.

- Utaqqiisaasumik ineqartitsinermut taama amerlatigisut aningaasartuutigineqarsimanerannut uanga isumaqarpunga kusanaappallaartoq. Kusanarnerusimassagaluarpoq angerlarsimaffeqanngitsunut illuliortitsiinnarunik, Hans Ole Petersen oqarpoq.

Elisabeth Fleischer Høj isumaqarpoq, 35 millioni koruunit utaqqqiisaasumik najugaqartitsinermut atorneqarsimanerat allat uppernanngitsorluunnit. Ajunnginnerutippaa, aningaasat sanaartornermut atorneqarsimagaluarpata.

- Taava inusuttut ukiorpassuarni utaqqisimasut initaarsinnaassagaluarput, Elisabeth Fleischer Høj oqarpoq.

Paalu Danielsenip aamma taama atuisimatigineq akuerisinnaanngilaa:

- Aningaasat inisaaleqisut inissialiuunnerannut atorsinnaagaluarmata.

Kristine Hansen isumaqarpoq, aningaasat taama amerlatigisut inunnut akiliinatik sivisunerusumik sivikinnerusumilluunniit ineqartitsinermut atorneqarsimanerat akuerineqarsinnaanngitsoq.

- Illuanilli isumaqanngilanga, utaqqiisaasumik najugaqartut aningaasartuutit tamaasa akilertariaqaraat, kisianni ilaat akilersinnaagaluarpaa, Kristine Hansen oqarpoq.