Utaqqerujussuarneq kingunipiloqarsinnaavoq
Inunnik imigassamik ikiaroornartumilluunniit atornerluinermik peqquteqarlutik katsorsartinnissamut qinnuteqartunut, piffissami sivisuumi utaqqisitsisarnerit, qinnuteqartunut peqqinnanngitsuusoq, nunatsinni Qaqiffinni pisortaq Lene Holm isumaqarpoq.
- Ajornartorsiuteqarnermik nassuerutiginninnissaq inummut imaannaanngitsuusarpoq, tamannalu pillugu ikiorneqarnissaq siunertaralugu saaffiginninneq aamma sapiitsuliornerusarpoq. Saaffiginnittup piffissami sivikinnerusumi utaqqinissi naammagisinnaasarpaa, Qaqiffinnissani piffissami utaqqiffimmini qilanaarluni piareersarsinnaasaramiuk. Piffissamili sivisuumi soorlu ukiut arlerlugit utaqqisariaqarnissamik ilisimatinneqarneq nuanninngitsuusarpoq. Katsorsartinniarluni piffissami sivisuumi utaqqisitaasoq sumiginnagaqqittutut misigisimalersinnaasarpoq, tamannalu kamannermik pilersitsisinnaasarpoq, naggataagullu inuk pineqartoq tunniutiinnarsinnaasarluni. Tamanna atornerluinerup sakkortunerujussuanngorneranik allaat kinguneqarsinnaasartoq Inge Holm oqarpoq.
Inge Holmip erseqqissaatigaa atornerluisuunermik ikiortariaqarnermillu nassuerutiginnikkiartornermut nukippassuit atorneqartarmata, utaqqisitaanerlu sivisuallaarpat, nassuerutiginninnerugaluaq tammariartoqqilersinnaasartoq kamannermillu annerusumik pilersitsinnaasarluni inummut pineqartumut kisimi tunnani aammali avatangiissaanut tuttartumik.
Ilaqutaasut suleqataasut allallu qanigisat katsorsartikkumasumut tapersersuisarput, katsorsartinniartorli pakatsisimalluni suli ajorneruleraangat aamma eqqugaasarput.
Inge Holmip erseqqissaatigaa kommuneqarfippassuit oqartussallu iliuuseqarnissamut tamarmik piumassuseqarluarnerat qujassutissaaasoq, taamaattorli aningaasat tunngavigalugit pingaarnersiuisarneq apeqquserneqartariaqartoq nunatsinni katsorsatikkumasut taama amerlatigitillugit.
Inge Holmip erseqqissaatigaa Qaqiffik nammisortuulluni ingerlasuummat, aningaasatigut immikkut soqutigisaqarluni taama isummersunnginnami, katsorsaasutulli misilittakkani tunngavigalugit oqaaseqarluni.
