Aalisarnermut ataatsimiititaliarsuaq Illuatungiliuttut qaaqquneqarnissartik utaqqikatakkaat

Illuatunguliuttut partiivisa Inuit Ataqatigiit aamma Partii Naleqqap  siulittaasui qaaqquneqarnissartik maanna utaqqivaat

Aalisarneq pillugu ataatsimiititaliarsuassap suliarineqarnerata naammassiartorneqarnerani, arlaleriarluni kinguartinneqartoq pillu partiit siulittaasuisa aalisarnermut naalakkersuisumit qaaqquneqarnissartik utaqqiuarsinnarpaat. 

AAMMA ATUARUK Naalakkersuisooqatigiit tapersersortaasalu isumaqatigiinnginnerat pissutaavoq

Aalisarneq pillugu ataatsimiititaliarsuassap suliarineqarnerata naammassiartorneqarnerani, arlaleriarluni kinguartinneqartoq pillu partiit siulittaasuisa aalisarnermut naalakkersuisumit qaaqquneqarnissartik utaqqiuarsinnarpaat.

Aalisarnermut Piniarnermut Nunalerinermullu Naalakkersuisup illuatungiliuttunit isornartorsiorneqarnermi kingorna maanna aalisarnermik inuussutissarsiuteqartut illuatungiliuttullu periarfissippai aalisarnermut ataatsimiititaliarsuup suliarineqarnerani ilanngussisinnaasut.

Taamaakkaluartoq Hans Enoksenip  Partii Naleqqami siulittaasup Aalisarnermut Naalakkersuisumit qaaqquneqarnissani qularaa.

-  Partiit allat tunngaviusumik isummersortinneqanngillat,  oqalukkaluarput partiit allat ilaatinneqassasut, kisianni naluara qanoq tamanna pimooorunneqartiginersoq, kisianni akuerinngilarput taamatut matoqqatigisumik, inuiaqatigiinni, aamma uagut allatulli qinersisartunik tunuliaqutaqarpugut,  aamma taakkua kiffartuukkusuppagut,  taakkuinnaanngillat, nunatta aningaasarsiorneranut sunniuteqarnerpaaq taamatut suliarineqassappat tamanna akuersaarneqarsinnaanngilaq, Hans Enoksen taama oqarpoq.   

AAMMA ATUARUK Aalisarnermut ataatsimiititaliarsuassaq iluatsinngitsuussaaq

Taassuma erseqqissaatigaa,  Naalakkersuisut isumaqatiginniarnissamut ammaassippata partii piareersimasoq suulli tunngaviunersut paaseqqaarusuppaat

-  Siullermik  Naalakkersuisut sunik siunnerfeqarlutik suliaqalersimappat ?  taakkua aallaavigalugit naligiittut,  aamma immitsinnut tatigeqatigiilluta oqaloqatigiinnissagut  aallaaveqarnissaat  siullertut kissaatigaarput, Inuit Ataqatigiit siulittaasuat taama oqarpoq.

Muté Bourup  Egedeli isumaqarpoq,  inuussutissarsiutinik ingerlataqartut illuatungiliuttullu ataatsimiititaliarsuup sulinerani tusaaneqarnissaat pingaaruteqartoq .

- Siammasissumik isumaqatigiissuteqarniaraanni,  ataqqeqatigiilluni oqaloqatigiinneq, peqataatitsineq,  siammasissumik, inuussutissarsiutinik  ingerlataqartunik aamma aalisartunik naalarnisinnaaneq pisariaqarluinnartoq, Muté Bourup Egede oqarpoq.

Aalisarnermut Naalakkersuisup Nikkulaat Jeremiassenip neriorsuutigaa Aalisarnermut Ataatsimiititaliarsuassamut missingiut sapaatip  akunnerani uani saqqummiunniarlugu