Usuup puuisa atorneqarnissaannik takoqqusaarutit pikkunaagaat
Illut ujaqqanit issunillu illuliat najugaqarfigisimanngisaannarpavut, kamiillu nalliuttorsiornerni aatsaat atorneqartarput, taamaattumik usuup puuinik atuinissamik tv-kkut takoqqusaarut, atuilernissamik inuusuttunut oqariartuuteqanngilaq.
- Assut pikkunaagivakka aamma tupatsinneqartutut misigisimanngilanga. Isumaqarpunga taama ittunik takoqqusaarusiussagaanni tupannartuusariaqartoq, taama oqarpoq Melissa Geisler, Tusagassiornermi Ilinniarfimmi ilinniartoq.
Ilinniartoqataata Louis Sigurdsenip takoqqusaarutip oqariartuutaa inuusuttunut tulluartuutinngilaa:
- Isumaqarpunga takoqqusaarutit takutissallugit sakkukippallaartut. Takoqqusaarummi inuit nuannaarpasittorujussuit takutinneqarput, naak nuanninngitsumik kinguneqartartoq.
Usuup puua atunngikkaanni toqussutigineqarsinnaanera tv-kkut takoqqusaarummi ersersinneqarsinnaagaluartoq, Louis Sigurdsen isumaqarpoq.
- Nappaassuup AIDS-ip toqussutaasinnaanera tyskit tv-atigut takoqqusaarummi Adolf Hitleriusaartumik inuttaatinneqartumi oqariartuutigineqarpoq. Issuaanngikkaluarluni AIDS-ip toqussutaasinnaanera nunatsinni paasisitsiniutigineqarsinnaavoq, Louis Sigurdsen isumaqarpoq.
Usuup puuisa inuusuttut akornanni atorneqarnissaannik kajumissaarinermi tv-kkut takoqqusaarutit naammanngitsut Louis Sigurdsen Melissa Geislerilu oqarput.
Meeqqat atuarfiini kinguaassiutit pillugit atuartitsinerni usuup puuisa atorneqarnissaat annertunerusumik sammineqarnissaa kissaatiginartippaat.
- Angajoqqaanik oqaloqatigiissutiginissaa paquminartinneqartarpoq, aamma atuarfinni atuartitsissutigineqartarnissaa amigaataavoq. Nammineerlunga kinguaassiutit pillugit atuartinneqarnikuunngilanga, Louis Sigurdsen oqarpoq.
Kinguaassiutitigut nappaatinik tunillatsissimagaangamik aatsaat paasinnilertartut, Melissa Geisler oqarpoq.
Atoqatigiinneq, usuup puuisa atorneqarnissaat kinguaassiutitigullu nappaatit pillugit angajoqqaanik ammanerusumik oqaloqatigiittoqartarnissaa kaammattuutigineqarpoq.
Namminersorlutik Oqartussat ilaqutariinnermut Pitsaaliunermullu Aqutsisoqarfiata, Paarisap, takoqqusaarutit assigiinngitsut pingasut KNR-TV-kkut maannakkut takutittarpai, taakkua Ice Mediamit suliarineqarput.
Inuusuttut aamma usuup puuisa atorneqartarnerat atorneqartannginneralluunniit pillugit kingusinnerusukkut radioaviisimi sammisaqaqqikkumaarpugut.
