Usuup puuinik atuineq Paavimit akuerineqalerpoq
Atoqatigiinnermi illersuuteqartarneq katuullit qullersaqarfiannit Vatikanimit akuerineqanngilaq. Tassalu Paavip Benedictip isumaa massakkut mumissimasoq, nutaarsiassaqartitsivimmit ritzaumit allaaserineqarpoq.
Kinguaassiutitigut nappaatit hiv aids-ilu tuniluunnerat pinaveersaartinniarlugit usuup puuisa atorneqarsinnaanissaat Paavip akuersineranut tunngavigineqarpoq.
Atoqatigiinnermi illersuuteqarnissaq kilagiivini akuerineqanngikkaluarpoq.
Katuullit palasiisa qullersaata Paavi Benedictip tusagassiortumit tyskimit apersorneqarnera atuaganngorluni marlunngorpat saqqummissaaq.
Usuup puuisa atorneqarsinnaanerannut katuullit ilagiivi tunngaviusumik akerliunnginnersut, Paavi Benedict ilaatigut aperineqarpoq.
- Soorunalimi ileqqorissaarnissaq ilumoortorlu eqqarsaatigalugu tamanna ajunngitsutut isigineqarsinnaanngilaq, tunillatsinnissaq annikillisinniarlugu siunertaqaraanni, alloriarnertut siullertut inuppalaarnerusumillu atoqatigiittarnissamut aqqutissaavoq, Paavi oqarpoq.
Tyskip tusagassiortup Peter Seewaldip Paavi Benedict 84-inik ukioqartoq akunnerni 20-ni oqaloqatigaa apersorlugulu. Oqaloqatigineqarnera maanna atuaganngorlugu saqqumersinneqassaaq.
Paavi Afrikami siorna 2009-mi angalaarnermini Afrikamiorpassuit HIV-mik AIDS-imillu tunillatsissimasut uppernarsillugit takuai. Taamanilu oqarpoq afrikamiorpassuit taamatut napparsimanerat alianartuusoq.
Taamaattorli nappaatip pinaveersaartinneqarnissaanut usuup puuinik atuinissaq tapersersorsinnaanngilluinarlugu oqarluni. Paavi taamani taamatut oqarnera akerleralugu sakkortuumik qisuariarfigineqarpoq.
