Usuup puui ajornaatsumik pissarsiarineqarsinnaasariaqarput
Inuit pissusilersortarnerminnik aammalu kinguaassiutitigut illersortarnerminnik allannguinitinniaraanni peqqissutsimut tunngasutigut perorsaariaaseq aqqugalugu usuup puuinik ajornanngitsumik pissarsisinnaanissaq aalajangiisuulluinnartuuvoq erseqqissarpaa.
- Pisariitsumik toqqaaneq tassaasussaavoq usuup puuinik ajornanngitsumi pissarsisinnaaneq. Tassa usuup puuanik atorfissaqartitsinermi usuup puua qanittumiittariaqarpoq. Usuup puuisa maanngarluni pissarsiarineqarsinnaanerisa ajornanngitsunnguunissaat nakorsiartarfimmiit isumaginikuuarput. Inuit naapittarfiini, qitigiartarfinni, imerniartarfinni allatullu inuit akornanniittarfiini usuup puuinik annertunerusumik pissarsisinnaalersinnerisigut inuit usuup puuinik atuinerulersinnaapput.
Taama Jesper Olesen naliliivoq. Taassuma ilaatigut immiaaqqat aammalu vodka-breezerit torluinut usuup puui nivinngarneqartalernissaat kaammattuutigaa.
- Tamanna periarfissaasinnaasoq isumarpunga, inuillu ilaasa tamanna oqqassaarinerusoq isumaqarsinnaapput. Tamannalumi taamaaliorneruvoq. Uanili pineqarpoq atoqatigiinnermi imminut illersorsinnaanerunissaq.
Paarisap usuup puuisa atorneqartarnissaannik paasisitsiniaarnera isiginnaarutikkut takuneqarsinnaasoq inuusuttunit isornartorsiorneqareersorlu, oqallissaarineq Nuummi nakorsat pisortaata saqqummiuppaa. Isiginnaarutikkut paasisitsiniaaneq taanna nalilersoqqaanngikkaluarlugu, isiginnaarutikkut paasisitsiniaaneq kisiat aqqutigalugu usuup puuinik atuisalersitsiniarneq naammanngitsoq, Jesper Olesenip naqissusiivoq.
Inuit pissusilersortarnerisa allanngortinnissaannut usuup puuisa ajornaatsumik pissarsiarineqarsinnaanerat aalajangiisuulluinnartuuvoq.
Paarisap isiginnaarutikkut paasisitsiniaaneranik isornartorsiuineq inuusuttut saqqummiuppaat. Taakku illu ujaqqanik issunillu qarmagaq kaminiillu usuup paai pillugit paasisitsiniaanermi ilaasariaqanngitsoq isumaqarput.
- Paasisitsiniaanerit kusassakkat maanna Paarisamit ingerlanneqartut taarserlugit nutaanik paasisitsiniaanernik ingerlatsisoqarlerpugut. Paasisitsiniaanerit taakku aappillersissinnaasariaqarlutalu kanngutsissinnaalersittariaqarpaatigut aammalu kinguaassiutitigut naappaatinut annilaajummersinnaasariaqarluta, taamaaliornikkut usuup puuinik atuisarneq pitsaanerulersagaluarmat, Melissa Geisler tusagassiornermik ilinniartoq taama isumaqarpoq.
Inuusuttut usuup puuinik atuilersinniarneqarnerminni annilaajallatsinneqarumapput.
Annilaajallatsitsisarlunili paasititsiniaanerit perorsaaneq eqqarsaatigalugu iluamik atorsinnaassuseqanngitsut, Jesper Olesen naliliivoq.
- Taamaammat annilaajummersitsisarluni paasisitsiniaanerit upperivallaanngilagut, paasisitsiniaanerilli allat inunnik oqaloqatiginninnerit inuit namminneq piumassusaannik allannguisartut isumarpugut, Jesper Olesen oqarpoq.
Usuup puui, qularnaatsumik atoqateqarneq aamma kinguaassiutitigut nappaatit pillugit paasisaqarnerujumagaanni Dronning Ingridip Napparsimmavissuani nakorsaq imaluunniit kinguaassiutitigut nappaatit pillugit immikkoortortaq attavigineqarsinnaapput. Napparsimmaviullu qularnaatsumik atoqarteqartarneq pillugu inuusuttut pitsaasumik siunnersorniarlugit peqqissaanermik sulisut ilaatigut meeqqat atuarfinnut aamma paasisitsiniaajartortissinnaalluarpai.
