Ussissaanermut piumasaqaatit sakkukippallaarsorineqarput
-Aallaqqaataaniilli ussissaalluarsimagaanni kiassarnermut akiligassatigut aningaasanik sipaartoqarsinnaagaluarpoq, illussanik titartaasartoq Peter Barfoed oqarpoq.
Sverigep avannaani aamma issittaqisumi ussissaanissamut piumasaqaatit nunatsinnut sanilliullugit marloriaammik sakkortunerupput. Danmarkimilu kippasimmik anorlertillugu aamma nillersinnaasartumi, ussissaanissamut piumasaqaatit aamma sakkortunerupput, tamannalu illussanik titartaasartup Peter Barfoedip tupigusuutigaa.
Ajornannginnersiortoqartariaqanngilaq, aallaqqaataaniilli ussissaalluartoqartariaqarpoq illummi ukiorpassuarni napasussaapput.
Illut amerlanersaat 2006 sioqqullugu sanaajupput, taamanilu ussissaanissamut piumasaqaatit suli sakkukinnerupput, iikkat minnerpaamik 15 centimeteriusussaatitaagamik.
Naak inatsisip piumasaqaataa ullutsinni 22,5 centimeteriugaluartoq, allanngortinneqartariaqaraluartoq, Peter Barfoed isumaqarpoq.
Taamaaliornikkut kiassarnermi sipaartoqarsinnaallunilu illup ilua silaannarinnerusinnaavoq. Ussissaanerup qanoq issutiginera kisimi aalajangiisuusanngimmat qanorli suliaalluartiginera aamma sunneeqataasarmat erseqqissaatigaa.
Ussissaaneq suliarineqarluarsimanersoq kissamik malussarniutit atorlugit misissorneqarsinnaavoq. Taamaaliortarnissarlu piaarnerpaamik atorneqalertariaqarpoq.
maannami sanaartortitsisut piumasaqaatit sakkukinnerpaat malillugit ussissaasarput, tamanna akikinnerusarmat.
- Ussissaalluarnissarmi akisunerusarpoq, kingusinnerusukkullu illu tuniniarniarunikku iluanaarutigisinnaasaannut sunniuteqarsinnaasarpoq. Taamatullu attartortut pisisullu kiassarneq akilertussaasarmassuk tamanna ussissaalluarnissamut kajungilersitsisanngilaq taamaattumik Namminersorlutik Oqartussat kommunilluunniit ussissaalluartarnissaq piumasaqaatigisariaqarpaat, illussanik titartaasartoq Peter Barfoed oqarpoq.
Sanaartornermut maleruaqqusani nukissamik atuinermut aalajangersakkat sakkortusineqarnissaat suliarineqartut aamma sanaartornermut oqartussaasut illut ussissusaasa misissuinikkut uppernarsarneqartalernissaannik siunissami piumasaqaateqartalersussaanerat Ineqarnermut Naalakkersuisup, Jens B. Frederiksenip ippassigami ilisimatitsissutigaa.
