Assi: Ritzau Scanpix

USAp sunniuteqarsinnaanera pillugu isorinnittut eqqarsarluaqqusipput

Kalaallit Nunaata USA-mit ikiorneqarluni naalagaaffinngorsinnaanera oqallissaangaartiaqqilerpoq. Partii Naleraq aama Demokraatit isumammut ammapput, isorniartulli isumaqarput USA-mut atanerulernerup Kalaallit Nunaata naalagaaffinngornissaa qanillisinnaavianngikkaa.

Amerikap præsidentiata Donald Trumpip Kalallit Nunaat pisiariumallugu isummani oqaatigimmagu amerlanerit ileqimisaartorput. Kisianni Trumpip soqutiginninnerata kinguneraa oqallisaalermat Danmarkip nunami maani inissisimanera USA-mit taarserneqassanersoq. Aqqaluk Lynge isumaqarpoq USA-mut pituttornissaq aqqutissaanngitsoq. Aqqaluk Lynge kalaaliuvoq ukiorpassuarni politikeriusimasoq Inuillu issittormiut kattuffianni ICC-mi siulittaasuusimasoq.

- Tamanna sakkortunerpaamik itigartitsissutigisariaqarparput. USAp ikiornianngilaatigut, pisiariniaraatigut-una, Aqqaluk Lynge oqarpoq isumaqarlunilu Donald Trumpip kissaatigisaa tassaasoq Danmarkip oqartussaasuuneranik nunattalu naalagaaffinngorusunneranik apeqqusiineq.

Allat ingalassimatinniarlugit Amerikamiut aningaasaat

Pele Broberg Partii Naleqqameersoq oqallinnermik aallarniisuuvoq. Nunatta aningaasaqarnermigut USA-mit tapersorneqarnissaa misissortariaqarnerarpaa, taarsiullugu Ruslandip Kinallu soqutigisaat nunatta itigartitsissutigissappagit. Steen Lyngemit Demokratineersumit tapersersorneqarpoq, taannalu isumaqarpoq USA-mit soqutigineqarnerput aningaasaqarnikkut pituttorsimajunnarnissatsinnut ikiuutaasiinnaasoq. Kisianni Aqqaluk Lynge isumaqarpoq mianersoqqissaarluni oqaaseqartariaqartoq.

AAMMA ATUARUK Naleraq: USA-mik isumaqatigiinniarnsinnaaneq misissorneqartariaqarpoq

– Kalallit Nunaanni politikeritut taanna pillugu oqaaseqarniaraanni mianersortumik oqaaseqarnissaq silatusaarneruvoq. Atsaat massakkut Kalaallit Nunaata Danmarkillu taanna (Trumpip pisiarinninniarnera, aaqq.) siunissami politikip tungaatigut qanoq sunniuteqassaanersoq paasiartulerpaat, Aqqaluk Lynge oqarpoq.

Bo Lidegaard: Akka pisooq iluarsiissutaanngilaq

Bo Lidegaard oqaluttuarisaanermik ilinniagakkaajuvoq, Nuummi inunngorsimalluni aammalu Kalaallit Nunaata Danmarkillu imminnut ataqatigiinerat immikkut sammisarisimallugu. Pele Brobergip oqaaseqarnera immikkut isummerfiginianngilaa, ataatsimulli isigalugu Danmarkip Kalaallit Nunaanni inissisimanerata USA-mit taarserneqarsinnaannera oqaaseqarfigalugu.

– Silarsuarmi misilittakkat tamarmik takutippaat nunap angisuup nuna mikisoq suleqatiginiarlugu ataqatigilerpagu, taava nunap angisuup piumasaa atutttartoq, Bo Lidegaard oqarpoq. Kalaallit annertunerusumik namminiilissappata, inuiaqatigiit imminnut napatissinnaasut aqqutissaavoq, ”akka pisooq” sunik tamanik akiliussisinnaasoq pinnagu.

- Siullermik pissutigalugu piviusut silarsuaanni akka pisooqanngimmat, tamatigut allatut akilerserujussuartikkusuttarput, kisianni aamma kalaallit inuiaqatigiittut ineriartornissaat nunat allat isumannaatsuunissakkut pisariaqartitaanik allanngorartunik tunngaveqassanngimmat pineqarpoq, Bo Lidegaard oqarpoq.

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat