Peqataaniarunnaartoqarnerani Nunarput VM-mi peqataariaannaasimanngilaqAssi: Noah Mølgaard

USA VM-qataasussaajunnaarmat Nunatta IHF-imut pakatsinera sakkortuusiinnarpoq

Assammik arsartartut kattuffiata TAAK amerikap avannaani assammik arsartartut kattuffiat NACHC atorlugu USAp corona pissutigalugu VM-qataaniarunnaarneranik IHFp suliarinninnera avoqqaariniarpaa

Assammik arsartartut kattuffiata TAAK-p nunarsuarmi kattuffissuarmut pakatsinera suli annertusiartorpoq.

Assammik arsarnermi VM sioqqullugu nunarsuarmi kattuffiup IHF-ip aalajangigassarinikuuaa USA Nunarpulluunniit peqataassanersoq.

Toqqaasariaqalernermi pissutaavoq nunarsuup ilaa taanna VM-imut inissamik ataasiinnarmik tunineqarnikuummat. Allaffissornikkulli aalajangiinnikkut USA VM-mi peqataasussanngortinneqarpoq.

AAMMA ATUARUK USA assammik arsarluni VM-imi peqataanissamit tunuartoq

IHF naliliivoq USA 300 millionit sinnerlugit innuttaqarami VM-eqataanermigut amerlanerusunik assammik arsartalersitsisinnaasoq.

USA-p peqataasussanngortitaanera Nunatsinni pakatsissutaaqaaq.

Assammik arsarnermi VM ullumi Egyptenimi aallartissaaq. Tassanili USA peqataassanngilaq. Tassami taakkunani iligiinni arsartut 18-it covid-19-mik tunillatsipput.

Taarsiullugu USA-p inissaraluanut Schweitz inissinneqarpoq.

Tamanna pissutigalugu TAAK suli pakatsineruinnarpoq USA-p inissaraluanik pissarsinissaq Nunatsinniit neriuutigineqaraluarmat

- Pissusissamisuunngilaq nunarsuarmi inissisimaffigisatta VM-mi inissamik arsaarneqarnera. Taamaattumik amerikap avannaani kattuffipput qinnuigaarput tamanna pillugu IHF-imut avoqqaarliuteqassasoq, TAAK-mi siulittaasoq Jørgen Isak Olsen KNR-imut oqarpoq.

AAMMA ATUARUK USA-mit assammik arsartartut nunarsuarmi pissartanngorniuuttoqannginnerani coronamik tunillatsittut

Kalaallit arsammik arsartartut peqataaffigisaanni nunarsuup immikkoortuani peqataaniarunnaarneq siornatigut aqqusaarneqareerpoq. Tamanna 2001-mi pivoq aningaasaqarniarneq pissutigalugu Cuba peqataaniarunnaarmat Nunarput peqataasussanngortinneqarmat tassanilu VM-ertoqarnerani kalaallit USA-mut ajugaapput.

Igitsinimiorli Hassan Moustafa præsidentitut pissaaneqartupilussuuvoq. TAAK-imit aamma ilimagineqanngilaq suliamut maanna sivitsortumut avoqqaarliuteqarnerup kinguneqarnissaa.

- Qisuariartoqarnissaa ilimaginngilara. Kisianni pingaarpoq taamatut pisoqartillugu qisuariaateqartarnissarput naak Hassan Moustafa præsidentiutillugu IHF-ip taamatut ingerlaannarnissaa ilimanaraluartoq, Jørgen Isak Olsen oqarpoq.

Assammik arsarnermi VM ullumi pingasunngornermi aallartippoq. USA siullermeerluni aqagu sisamanngornermi unammisussaagaluarpoq. Danmark siullermeerluni tallimanngorpat unammissaaq. Danmarkip unammineri KNR-TV-mi toqqaannartumik aallakaatinneqassapput.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat