USA uumasunik timmisartuussisartutaarpoq

Qimmiutiminnik qitsuutiminnillu timmisartuussiniartut imaaginnavipput, timmisartorlu qaammatini tulliuttuni arlalinni ulikkaaqqassaaq, billetimmi nungoreeramik. Timmisartuutileqatigiiffiup piginnittua Dan Wiesel taama oqarpoq.

Taassuma timmisartornialertilluni qimmiutini lastrumimut inissittariaqarsimavaa, qimmimullu piginnittumullu tamanna ajorpallaaqimmat qimminik qitsunnillu timmisartuussisalernissamik isumassarsivoq, timmisartuutileqatigiiffillu Pet Airways pilersillugu.

USA-mi illoqarfiit assigiinngitsut tallimat maanna tikinneqarsinnaalereerput, timmisartut immikkut naleqqussakkat atorlugit. Qimmit qitsuillu imermik nerisassanillu pissaqarput, tæppimillu aamma tunineqartarlutik. Saqisoq immikkut aamma isumagineqarsimavoq, uumasummi nakorsaat saqisutut suligami.

Qimmit qitsuillu taamaallaat ilaasinnaatitaapput, uumasulli allat aamma timmisartuunneqartalernissaat Dan Wieselip pilersaarutigaa.