USA uppernarsaatinik takoqqaarusuppoq
Ilisimatuussutsikkut uppernarsartariaqarpoq silaannaap allanngoriartornera pinngortitap nammineq pilersinneraa imaluunniit inuit mingutsitsinerannit pinersoq, tamanna uppernarsartinnagu USA-ip annertuumik mingutsitsinini iliuuseqarfiginianngikkaa, Ilulissani silaannaap allanngoriartornera pillugu ataatsimiinnermi amerikamiut peqataatitaat oqarpoq.
Nunatta sermersua naatsorsuutigisamik sukkanerusumik nungukkiartorpoq, soorlu qalasersuaq avannarleq nungukkiartortoq, taamatuttaaq manerassuarmi qeqertaaqqat immap ataanut tammariaannaapput.
Silarsuatsinni silaannaap gassinik minguttitsisuisa annersaata, tassa USA-p sinniisaa, aperigatsigu iliuuseqarniarnersut, Dr. Harlan Watson US Department of State-mi atorfilik oqarpoq ilisimatuussutsikkut uppernarsaasoqartariaqartoq USA iliuuseqartinnagu.
Silaannarmik minguttitsinerpaaginnanngilagut, aammali tunisassiornerput aqqutigalugu iluanaaruteqarnerpaajuvugut, USA-llu ilisimatusarnermut millionit arlalissuit ilisimatusarnermut atortarpai.
Amerikamiut aamma avatangiisimik mingutsinneqannginnissaannut soqutiginnittuupput namminermi minguitsumik silaannaqarlutillu aamma imiuteqarusukkamik.
Amerikamiummi Issittup uumaneerunnissaa qeqertaaqqallu tammarnissaat soqutiginngilluinnaramikku?
Soorunalimi soqutigittaatsuunngilagut taamaammallu nunanut allanut sanilliullugu USA aningaasanik amerlanerujussuarnik nunarsuup allanngoriartorneranut atuinerpaajuvoq.
- Silaannaap allanngoriartornera inunnit unitsinneqarsinnaanersoq apeqqutaavoq, naluvarpummi sila nammineq allanngoriartornersoq imaluunniit mingutsitsinerup kingunerisaanik allanngoriartornersoq. Siusinnerusukkut sermit sikullu nungukkiartortarnikuupput inuunermut ajoqutaanngitsumik, pisinnaasannguarpullu tamaat allanngoriartornermut malinnaavugut, Harlan Watson Amerika sinnerlugu Ilulissani peqataasoq oqarpoq.
Danskit avatangiisinut ministeriat Conny Hedegaard pisortatigoortumik tusagassiortunik unnugu nalunaaqutaq arfineq-marlunut katersortitsissaaq, ilaatigut BBC-mit peqataaffigineqartumik.
