USA, Syria Iran-ilu naapilerput

USA-p isumaqatigiinniartunut Iranip Syriallu ilaaffigisaanut ilaanissani akuersaarsimavaa.

Taamaaliorneq USA-mit nunat tamalaat akornanni inussiarnisaarneruvoq nalinginnaanngitsoq.

Tassami manna tikillugu nunat taakkua marluk isumaqatigiinniarnissaat imaluunniit toqqaannartumik oqaloqatiginissaat USA-mit akuersaarneqarumanngilluinnaraluarmat.

Bagdadimi ataatsimeeqatigiinnissami USA-p nerrivimmi issiaqatigisussanngorpai Iranip aamma Syriap aallartitai, naalagaaffiit taakkua marluk USA-p naalagaaffipalaatut peqqarniisaarnianillu illersuisutut taagortaraluarpai.

Irakimi naalakkersuisut qaammatip tulliani taamatut ataatsimeeqatigiinnissamut qaaqqusisuupput. Ataatsimiigiaqquneqartut tassaapput nunat Irakip eqqaamiui aamma FN-ip isumannaallisaaniaqatigiivinut ilaasortat tallimaasut.

Amerikamiut atorfilittaasa ilaat oqarsimaneragaavoq USA-p nunat taakkua toqqaannartumik oqaloqatiginianngikkai, oqaloqatiginissaannulli Irakimiut akunnermiliuttutut atorniarai.

Iran Syrialu Irakimut killeqarfeqarput taamaattumillu Irakimi pissutsinut soqutiginnittuullutik. Kisianni Amerikamiut Syria ingammik Iran pisuutippaat Irakimi peqqarniisaarnianut sakkunik qaartartunillu pilersuisuunerarlugit sungiusaasuunerarlugillu. Amerikamiut sakkutuuisa isertortumik paasiniaasartut oqaatigaat Amerikamiut sakkutoorpassui Iranimiut qaartartuutaannit toqutaasartut. Tamatumunnga akissutitut USA-p naalagaaffiit taakkua marluk sunut tamanut mattuppai oqaloqatigerusunngilluinnarlugillu. Tamanna Amerikami isornartorsiorneqaleraluttuinnarpoq, soorlu politikerit Demokratit republikanerillu nuimanerusut nunat taakkua sunniuteqarnerisa atorluarneqartariaqarnerat Bushimut siunnersuutigisarpaat. Kingulliulluni siornatigut USA-mi nunanut allanut ministeriusimasup Henry Kissingerip Bushimut siunnersuutigaa, Irakip isumannaatsuunissamut ajornartorsiutai qaangerneqassappata nunat Irakip sanilerisai suleqatigineqartariaqartut.