USA sulisuni eqqumiitsunik ersiuteqartut Kinamit aallartikkai

USA-p sulisuni arlallit Kinamit aallartippai. Nakorsat misissuereernerisa kingorna paasinarsivoq sulisut arlallit amerikamiut diplomatiisa Cubami siorna ajoqutigiligaannut assingusunik ersiuteqartut.
Illoqarfimmi Guangzhoumi amerikamiut sinniisoqarfianni sulisup "nipimik naqitsinermillu nalinginnaanngitsunik" nalaataqarsimavoq Assi © : xiquinhosilva/Flickr Creative Commons
Allattoq Ritzau
juunip 07-at 2018 08:07

Amerikamiut nunanut allanut tunngasunut ministereqarfiata oqaaseqartartua, Heather Nauert, taama ilisimatitsivoq.

Taanna oqaluttuarpoq nakorsat amerikamiut amerikamiut sulisuinik taakkulu ilaqutaannik misissuiartortillugit Kinamut aallartinneqarsimasut. Illoqarfimmi Guangzhoumi amerikamiut sinniisoqarfianni sulisup "nipimik naqitsinermillu nalinginnaanngitsunik" nalaataqarsimanerata kingorna taama pisoqarpoq.

Aviisip The New York Timesip pingasunngormat allaaseraa inuit ikinnerpaamik marluk "Kinami nipinik eqqumiitsunik tusaasaqarsimanerisa kingorna" Kinamit aallartitaasimasut.

Amerikamiut diplomatii taakkulu ilaqutaat katillugit 24-t, Cubamiinnerminni eqqumiitsumik nalaataqarlutik anigorsinnaanngisaminnik tusaaniarnermikkut innarlerneqarsimanerat siorna saqqummiunneqarpoq. Nipinik qataattupilussuarnik tusaasaqarnerisa naqitsinermillu misigisaqarnerisa taama pisoqarpoq.

/Ritzau