USA suli sukataarpoq

Iranip atomip nukinganik sakkussiorniarnera ingalassimatinniarlugu USA sukataaleraluttuinnarpoq. Iranimi palasit aqutsisut nangartarneqarnerminnut tusaanianngippata, USA-p nunat arlallit oqartussaasuisa Iranip niuernera akornusersoqqunialerpaa – kisianniligooq uuliaataa pinnagu!

Naalagaaffiit Peqatigiit Isumannaallisaaniaqatigiivisa Iranimi atomip nukinganik nukissiorfiliornissap iliuuseqarfiginiarneqannginnera USA-p præsidentiata, George Buship, qatsulluinnarpaa.

USA-p Iranimik killilersuiniarnerujussua Ruslandip Kinallu peqataaffiginianngilaat, sakkutuuliinermik kinguneqaannarsinnaammat; USA-llu Iranip avammut nioqquteqarneranik akornusersuiniarnera akuersaarnianngilluinnarpaat.

USA-p, pingaartumillu Israelip naalagaaffiani oqartussat, Iranimiut atomip nukinganik qaartartorsualiorsinnaanera annilaanngatigaat.

Naalagaaffiit Peqatigiit iliuuseqarnianngiinnarpata nunanik illersortiminnit George Bush ikiortissarsiorlunilu tapersersortissarsiorniarpalulerpoq.

Iranip atomip nukinganik nukissiorfiliorniarnertik taamaatinnianngippagu Israel sioorasaarivoq sakkutuutik Iranimut isaatinniarlugit.

Israelip ministeriunerusimasaata Simon Perezip Iran mianersoqquaa, naalagaaffiummi Israelip imminut illersornissani sillimaffigereermagu.