USA suli 7.000-inik sakkutuuliniarpoq
USA-p præsidentia George W. Bush januaarimi aalajangerpoq Irakimi sakkutuut 20.000-inik ilaneqassasut. Tamanna oqallinnerujussuarmik pilersitsivoq, tassami amerlanerusunik sakkutuuliinissaq Demokratit akerlerimmassuk.
Taamaakkaluartoq Bush sakkutuunik 7.000-inik maanna Irakiliartitsiniarpoq! Præsidentillu piumasani iluatsissagunarpaa, naak Demokratit inatsisartuni maanna amerlanerussuteqaraluartut.
Amerikamiut Irakimut periaasissaat isumaqatigiissutigineqarsimatsiaannartoq, nutaamik aaqqiagiinngissuteqartoqaqqilerpoq. Irakimi uiverneq iliuuseqarfiginiarlugu amerlanerusunik sakkutuuliinissaq republikanerit akornanni akerlerineqaleraluttuinnarpoq. Taamaattorli Buship piumasani iluatsittussanngorpaa.
Irakimi illoqarfiit pingaarnersaanni upperisarsioqatigiit imminnut sorsuuttuarnerat iliuuseqarfiginiarlugu sakkutuut naalagaasa sakkutuut Irakimiittut 21.500-nik amerlineqarnissaat piumasarisimavaat. Tamatumani anguniagaavoq upperisarsioqatigiit illuatungeriillutik sakkulersortut peersinneqassasut inatsisillu malillugit inuusoqalissasoq. Kisianni shia aamma sunnimuslimit sakkulersorlutik akersuuttut sakkutuunut tunniutiinnarusunngillat. Taamaattumik anguniakkap anguneqarsinnaanissaanut ukiut arlallit suli ingerlasinnaassapput, tassa anguniagaq anguneqarsinnaassappat.
Irakimi amerlanerusunik sakkutuuliinissamut akerliusoqaraluaqisoq Bush naalakkersuisunilu maanna sakkutuut 7.000-inik ilaneqarnissaat aalajangiussimavaat.
Illersornissamut ministerip tulliata Gordon Englandip aningaasartuutissat ippassaq inatsisartuni ataatsimiititaliamut saqqummiuppai. Tamatumunnga tunngavigineqarluni sakkutuut naalagaasa Irakimi isumannaatsuuneq anguneqassappat suut pisariaqartinnerlugit saqqummiussisimanerat.
Taamatut aalajangiussinissaq iluatsissimavoq Irakimi sakkutooqartitsineq Demokratit – maanna inatsisartuni amerlanerussuteqartut - isumaqatigiinngissutigimmassuk, tamannalu atorluarlugu Buship piumasani maanna iluatsippaa.
