USA-p Europami nioqqutissiat akitsuutitigut qaffaavigisussanngorai

USA-p EU-mi nioqqutissianut arlalinnut akitsuutit atuutereersut oktobarip 18-iani qaffaavigisussanngorpai.

Nutaarsiassaqartitsivik dpa taama allaaserisaqarpoq.

Nutaarsiassaqartitsiviup AFP-ip allaaserisaani allassimasut naapertorlugit USA-p akitsuutitigut qaffaanermigut timmisartut akitsuutitigut 10 procentimik qaffaavigisussaassammagit ilaatigut timmisartunik avammut niueruteqartartut eqqugaassapput.

Timmisartulli atortui akitsuutitigut qaffaavigineqassanngillat.

Nioqqutissiat allat, soorlu nunalerinermi nioqqutissiat ilai, akitsuutitigut 25 procentimik aamma qaffaavigisussanngorpai.

Nunat tamalaat niueqatigiinnikkut suliniaqatigiiffiata WTO-p timmisartulioqatigiiffissuup Airbusip naalagaaffinnit inatsisitigut naapertuutinngitsumik tapiissutisisarnera pillugu suliassanngortitaq sivisuumik naammassiniareerlugu pingasunngormat aalajangiivigereeraalu EU-mi nioqqutissiat akitsuutitigut qaffaavigineqartussanngorput.

Europami nunat arlallit Frankrigimi ingerlatseqatigiiffimmut Airbusimut inatsisitigut naapertuutinngitsumik tapiissuteqartarnertik pillugu USA-mit 2004-mili unnerluutigineqarput. USA naapertorlugu Airbusip naalagaaffinnit naapertuilluanngitsumik tapiiffigineqartarnera unammillertaata Amerikami timmisartulioqatigiiffissuup Boeingip eqqugaaneranik kinguneqarpoq.

WTO USA-p unnerluutiginninneranut tapersiinissaminut pingasunngormat aalajangerpoq, tamannalu EU-mi nioqqutissiat akitsuutitigut qaffaavigineqarsinnaanngornerannik malitseqarpoq.

Europami nioqqutissiat akitsuutitigut qaffaavigineqartussanngortut qanoq amerlatigissanersut suli ilisimaneqanngilaq.

Reutersip allaaserisamini WTO USA-p Europami nioqqutissianut akitsuutitigut ukiumut 7,5 milliarder dollarsinik qaffaanissaanut akuersisimanerarpaa.