USA-p isumaqatigiissummut peqataaniarunnaarnini aalajangiusimaannaraa

Præsidentip Illorsuani oqaaseqartoq Sarah Huckabee Sanders, nutaarsiassaqartitsivik AP naapertorlugu taama ilisimatitsivoq.

Aviisip The Wall Street Journalip, præsident Donald Trumpip isumaqatigiissutip peqataaffigiunnaarnissaanik siunniusaqarnerminik taamaatitsineranik allaaserisaa Præsidentip Illorsuanit taamaalilluni ilumuunnginnerarneqarpoq.

- USA-p Parisimi isumaqatigiissummut isummani allanngortinngilaa, oqaaseqartartoq oqarpoq.

USA-p silap pissusia pillugu Parisimi isumaqatigiissut, nunanit 195-init 2015-imi decembarip qaammataani isumaqatigiissutigineqartoq peqataaffigiunnaassagaa Præsident Donald Trumpip juunimi nalunaarutigaa.

Præsidenti sulisuilu isumaqarput nunarsuup silaannaata kissatsikkiartornerata annertussusia qularnartortaqartoq. Aamma silap pissusiata allanngoriartornerata inunnit piliaanera qularinerarpaat.

Amerikamiut isumaqatigiissummut peqataajunnaarniarnerat nunani tamalaani siuttunit nikalluallaatigineqarlunilu pakatsissutigineqarpoq.

Aamma suliffeqarfissuit, soorlu Facebookip, Applep, Googlep aamma uuliamik nioqqutissiorfissuup BP-ip Trumpip silap pissusianut tunngatillugu tunuartilernera isornartorsiorsimavaat.
 
/ritzau/