USA Ruslandilu sakkussakillisaanialerput
- Kisiannimi suli imaappoq, taakkua imminnut qasseeriaqalutik qaartitsiffigeqattaassinnaammata, taamaalillunilu 2000-iniit 1500-nut ikilisitsisoqassappat oqartoqarsinnaanngilaq silarsuaq toqqissinarsisimasoq. Kisiannili politikkikkut qiviassagaanni tamanna alloriarneruvoq pingaarutilik, tassa taakkua Atlantiku qulaallugu imminnut pimoorullugu oqaloqatigeeqqilersinnaammata. Taama lektor Erik Kulavigip Syddansk Universitetimi Center for Østeuropæiske Studierimeersup naliiivoq.
Isumaqarpit USA-p Ruslandillu akornanni pissutsit pitsaanerulissasut?
-Taamatut isumaqarpunga, aap. Tassami Rusland nammineq paasinninnini naapertorlugu Sovjetunioniusimasup atorunnaarnerata kingornagut assorsuaq siuariarsimammat demokratiip niuernikkullu aningaasarsiornerup ineriartortinneqarsimanerat nunanullu killernut qanilliartorneq eqqarsaatigalugit. Uanga aamma nammineq paasivara isumannaallisaanikkut politikkeqarnermut soqutigisat eqqarsaatigalugit sorpassuit pisiariortorneqarsimasut. Bushikkunnili iluamik paasisaqartoqarsimasorinngilara, Obamalli tamatumunnga paasinninnini ersersippaa, russillu oqaluttuullugit nunarsuup kitaata tamanna pingaartimmagu Ruslandilu allatut pissuseqarluni qanilliartorneqartoq, isumaqarpungalu tamanna oqaloqatigiittarnerup nangeqqinneqarnissaanut assorsuaq pingaaruteqartoq. Illuatungaatigut aamma Rusland nunani tamalaani aningaasarsiornerup ajutoornera allallu pissutigalugit annertuumik eqqorneqarsimavoq, paasiartuinnarsimallugulu kikkut ikinngutaanersut ilumoortut, tassalu USA nunallu killiit.
