USA: Republikanerit Amerikami Qiterlermiumik eqqartuussisuuneqarusunngillat

Eqqartuussiviit qullersaanni eqqartuussisuunissamik Amerikami Qiterlermiumik aatsaat siunnersuuteqartoqarpoq. Tamatuma saniatigut Sonia Sotomayor eqqartuussisuuvoq killilersuerusunngitsoq, taamatullu isummertarnini inatsisinik paasinnittaatsimini pingaarnerutissagaa, republikanerit annilaangassutigaat.

Taamaammat Republikanerit Sonia Sotomayor persaraat.

- Sonia Sotomayor eqqartuussissuserisutut eqqartuussisutullu tatiginassuseqanngitsoq uppernarsisinniarlugu Republikanerit tamaviaaqaat, inatsisit malillugit ingerlatsiniarnersoq imaluunniit isummani malillugit ingerlatsiniarnersoq ilaatigut apeqqutigisarlugu. Taamatut aperisarnerminni Sotomayorip oqalugiaatai allagarisarsimasaaluunniit republikanerit innersuuttarpaat, tamatumani eqqartuussisuunngitsutut polikerisulli oqariartuuteqartarnera pineqarluni.

Republikanerilli saassusseqattaarnerat suli ajunngitsutut oqaatigineqarsinnaavoq. Sotomayorip Amerikami Qiterlermiuunera siullerpaamillu tamaanngaanneersumik eqqartuussiviit qullersaanni eqqartuussisuunertut ivertinniarneqarnera USA-mi qinersisartorpassuit Amerikami Qiterlermeersut millionilippassuit nuannareqaat.

Inatsisartut illorsuata silataanni Amerikap qiterlermiorpassuit illorsuarmut isernissaminnut utaqqipput nuannaartorisartik Eqqartuussiviit qullersaanni eqqartuussisuunertut ivertinneqalerpat takorusullugu.

Taamaammat Republikanerit Senatemi tusarniaaffigilerunikku qajassuutilaassavaat. Taamaaginnartoqassagaluarpammi Amerikami Qiterlermiunit kingoqqisut qinersisartut kamatsinneqalersinnaammata, eqqartuussiviit qullersaanni immaqa eqqartuussisussanngortussaq Republikanerit inuttut saassutariinnassappassuk.

Qanorluunniit pisoqassagaluarpat amerlanerit naatsorsuutigaat Sotomayor akuerisaassasoq taamaalillunilu Amerikami Qiterlermit kingoqqisuni siullersaalluni suliffigiligassaminut ivertinneqassaaq.