Ruslandip NATO-mi aallartitaa isumaqarpoq USA-p Polenillu isumaqatigiissutaat naapertorlugu qaartartunut igeriuttakkanut upalungaarsimanermut atatillugu Polenimi inissiiniarneq Ruslandimut sammitinneqartoq.
Ruslandip aallartitaa isumaqarpoq Ruslandip Georgiallu aaqqiagiinngileruttorneranni USA-p Polenillu isumaqatigiissummik atsioqatigiinnerisa ersersikkaa qaartartunut igeriuttakkanut illersuutissatut taaneqartut Iranimut atorneqassamaarneqaratik Ruslandimut atorneqartussatut inissinneqartut.
Ruslandimi sakkutuut qullersaqarfianniit nalunaarutigineqarpoq USA-p Ruslandillu akornanni pissutsit atsioqatigiittoqarneratigut ajorsiallattut.
Polenimi qaartartunik igeriuttakkanik qulinik inissiisoqarnissaa pilersaarutigineqarpoq, taakkununnga atatillugit Tjekkiami radareqarferujussuarmik inissiinissaminnut amerikamiut akuerineqareernikuupput.
USA-p qaartartunut igeriuttakkanut illersuutissiornissamut tunngatillugu pilersaarutaasa 2012-imi naammassineqarnissaat siunniunneqarnikuuvoq.