Nuummi ilinniartuunngorniarfiup ilinniarfissuullu ataatsimoorullugu atuagaateqarfianni Amerika pillugu nittartakkakkut paasissutissiivik pisortatigoortumik ammarneqartoq takussutissiivoq Kalaallit Nunaat, Danmark USA-lu suleqatigiilersut.
USA-p Danmarkimi aallartitaqarfia Nuummilu Ilinniarnertuunngorniarfik suleqatigiillutik nittartagaq "americancorner" USA-p Danmarkimi aallartitaata Stuart Bernsteinip pisortatigoortumik marlunngormat ammarpaa.
Nittartakkap www.americancorner.gl -ip quppernera siulleq kalaallisuinnaq allagaavoq, ingerlariaqqiffissalli assigiinngitsoorpassuupput, soorlu USA-mut tikeraarniaraanni qanoq iliornissamik ilitsersuutit, imaluunniit USA-mi ilinniariarnissamut periarfissat, minnerunngitsumillu USA-p Danmarkip nunattalu Igalikumi aasaq isumaqatigiissutaat ilanngunneqarsimalluni.
USA-p nunattalu inuusuttunut ilinnialerusuttunut suleqatigiissuteqarnissaq salliutinniarmassuk nittartagaq pilersinneqarsimasoq Namminersornerullutik Oqartussani pisortaanerup Kaj Kleist oqarpoq.
- Amerikamiunik suleqateqarnitta ilinniartitaanikkut ilisimatusarnikkullu tunngavissiorluarnissaa piviusunngortinnissaalu ungasinnerusoq eqqarsaatigalugu pisussaavoq, Kaj Kleist oqarpoq.