USA-p tapiisarnini unitsittariaraa qineqqusaartoq isumaqarpoq
Taassuma Pakistanimi generalit, Saudi-Arabiap kunngia, Igitsinip præsidentia Mubarak, Irakimilu præsidentiusimasoq Saddam Hussein kisermaassillutik naalakkersuisuusut USA-p qanimut suleqatigisimasaatut ulorianartutut assersuutigai.
McCainip taamatut oqarnermigut maanna USA-mi præsidentiusup Buship periusaanut uniuuttumik alloriarpoq ukiorpassuarnilu USA-p nunanut allanut politikkianut akerliusumik oqaaseqarluni.
McCain ippassaq oqalugiarami Bush taassumalu naalakkersuisuutitai isornartorsiorpai, nunanut allanut politikkiminnik ingerlatsinerminni iliminnik oqaloqateqarneq ajornerarlugit. – Iligisavut oqaloqatigisinnaasariaqarpavut piumassusaallu ataqqillugu, McCain oqarpoq nangipporlu: pissaanilissuugatta imaanngilaq piumasattaannguatsinnik pissasugut. McCain aamma oqarpoq kissaatigalugu Guantanamo-mi paarnaarussiviup matuneqarnissaa, sakkussiat atomitortut ilaasa isaternissaat USA-llu nunarsuarmi mingutsitsinnginnissamut peqataanerunissaa.