USA-p suliniutai Afghanistanimi pisup alianartup ajoquserpai

Afghanistanimi naalakkersuisut isornartorsiuipput USA-llu timmisartuminngaanniit saassussinerani sakkutuujunngitsut 27-t toqutaanerat utoqqatsissutigalugu. Præsident Obamap Afghanistanimi innuttaasut NATO-p tungaanit ajugaatinniarnerannik periaasia pisimasumit alianartumit ajoquserneqarpoq, Danmarkip Radioa taama tusagassiivoq.
februaarip 22-at 2010 15:34

Afghanistanimi maannakkorpiaq NATO-p sakkutuuisa sorsoqataaneranni aallarteqaammersumi inuit sakkutuujunngitsut inuunerminnik annaasaqartarnissaat pinngitsuuinneqarsinnaanngilaq, sakkutuut iligiit pillugit oqaaseqartartoq generalløjtnant Nick Parker ullumi taama oqarpoq, tamatumunngali peqatigitillugu oqarluni, annaaneqartut aliasuutigineqartullu pilersitatik USA-p iligiillu assorsuaq utoqqatsissutigigaat.

Alianartoq pivoq, nunap immikkoortuata kujataa'tungaani Uruzganimi biilit ingerlaaqatigiiaat Afghanistanimiuusoralugit NATO-p sakkutuuinik saassussiartortut, NATO-p timmisartuata kukkulluni saassummagit. Paasinarsivoq tamanna kukkuluttornerusoq, tassami tamatumani sakkutuujunngitsut pineqarmata. Inuit 27-t taakkunannga arnat sisamat meerarlu ataaseq toqutaapput, allallu aqqaneq-marluk ikiligaallutik.

Afghanistanimili naalakkersuisut Afghanistanimiut sakkutuujunngitsut saassunneqarnerat isornartorsiorpaat, naalakkersuisullu oqaaseqartartuata Hakim Azeerip nunat allamiut sakkutuullu afghanistanimiut akornanni pitsaanerusumik ataqatigiissaarinissaq suleqatigiinnissarlu piumasaralugit.

Amerikamiut sakkutuuisa erseqqissarpaat kukkusumik saassussineq nunap immikkoortuani Helmandimi talibaninik pikitsitsisunik nungusaanerup annertoqisup ilaginngikkaa, tassani siornatigut inuit sakkutuujunngitsut aqqaneq-marluk toqutaapput.

Sakkutuujunngitsunik annaasaqarneq præsident Obamap Afghanistanimi periaasissamisut kissaatigisaanik qajannarsisitsivoq. Obamap Afghanistanimi sakkutuujunngitsut talibaninut akuersaartuunnginnissaat NATO-llu tungaaniinniaqqullugit kissaatigaa, tamannalu aamma pissutigalugu inuit amerlasuut ataatsimoorfiini saassussisarnissaq pinaveersaarneqarluni. Kisiannili arnat meeqqallu pisuussuteqanngitsut sorsunnermi pilliutigineqartillugit, tamatumani præsidentip pilersaarutai ajornartorsiortinneqarput.