USA-p sineriaani uulia suli maqivoq
USA-p sineriaani uuliamik maqisoornerup kinguneranik, uuliamik qalluiviup aseqquanik milisseriaraluarneq iluatsinngitsoq, BP ippassaq arfininngornermi unnukkut nalunaarpoq.
Allattoq Apollo Jeremiassen
maajip 09-at 2010 13:22
Ippassaq ulloq naallugu, uuliamik qalluiviup aseqqua aqqartartut milinniarlugu, qaarajuttoq 100 tonsi ikkunniarlugu iluatsinngitsoorpaat. Qaarajuttoq ikkussassaq immap nillernerata sermersittarsimavaa, taamaammallu ikkussiniarneq taamaatiinnartariaqarallartoq BP-mit nalunaarutigineqarpoq.
Uuliamik qalluiviup kivineranit sapaatip akunneri marluk qaangiussimalerput.
USA-p sineriaani anorip nunasarnernerata siniak annikitsunnguaq kisiat mingutsissimavaa, taamaattoq ilisimannittut oqarput qanittumi uulia maqisoq unitsinneqanngippat avatangiisinik mingutsitsineq annertuupilussuanngussasoq.
Uuliamik qalluiviup aseqquanik milisseriaqqittoqassaaq ullut marlussuit qaangiuppata. Qaarajuttuq ikkunniagaq inissiarsuit quleriit sisamatut portutigaaq.
