Umiarsuarnik sikunik aserorterutinik amerlanernik USA peqartariaqaraluarpoq, taamaalillunimi issittup imartai Canadamit kisermaanneqassanngikkaluarput.
Issittumi pissutsinut USA-mi ataatsimiititaliarsuup siulittaasua, Mead Treadwell, taama isumaqarpoq. Canadami ministeriunerup, Stephen Harperip, Issittoq pillugu suli angusaqarniaqqinniarluni oqarnera Mead Treadwellip maluginiarsimavaa.
- Canadap ministeriunera Avannaarsuani kisimi oqartussaaffeqarniarluni arlalitsigut oqartartoq tusartuarparput, Med Treadwell nittartakkamut Canada naggat com-imut oqarpoq.
Sikunik aserorterussuit uuliamik siunissami qalluinissanut misissuinernullu USA-p peqataasinnaalernissaanut atorluarsinnaagaluartut Treadwell isumaqarpoq.
Amerikamiut - aviisi naapertorlugu – Canadamut akuersissummik piniaqqaannguaratik - pingasoriarlutik Sullualukkooreerput.
Kingullermik taama pisoqarpoq 1995-mi, aqqartartoq taamani Sullualukkoormat.
Maanna anguniarneqartoq tassaavoq, sikunik aserorterutinik marluugallartunik pisinissaq – taakku katillugit 1½ millioni dollarinik akeqassapput.