USA-p Sermersuarmi misissuiveqarsimanera unioqqutitsinerunngilaq
Danmarkimi nunanut allanut tunngasunut ministeri Holger K. Nielsen Siumumeersumut Doris Jakobsenimut akissummini taama allappoq. Doris Jakobsen misissuivimmut Camp Century-mut tunngasunik tassanilu atomip nukinganik nukissiuuteqarsimanera pillugit piffissami sivitsortumi paasisaqarusussimavoq.
Ministerip akissummini Illersornissamut isumaqatigiissut 1951-imeersoq Igalikumilu isumaqatigiissummut ilanngussaq 2004-meersoq innersuussutigai.
Doris Jakobsenip ilaatigut paaserusutaanut ilaalluni, atomip nukinganik nukissiuummik inissiineq Danmarkimit akuerineqarsimanersoq aamma nakkutigineqarsimanersoq.
Nunanut allanut tunngasunut ministerip akissummini taamaallaat erseqqissarpaa, misissuivik Camp Century ullutsinni atorneerutereermat aamma USA-p isumaqatigiissutinik tamanik naammassinnissimannginnissaa ilimagissallugu pissutissaqanngitsoq.
Doris Jakobsen Danmarkiliarluni angalasoq pineqartoq pillugu oqaaseqartissinnaasimanngilarput.