USA-p Rusland aamma Kina tapersersuilersippai

Immikkorluinnaq iliuuseqarnermigut USA-p Rusland Kinalu isumaqatigiissutissamut tapersersuilersippai.

- Isumaqatigiissut imaannaanngitsoq Ruslandimit Kinamillu tapersersorneqartoq isumaqatigiissutigaarput, Amerikami nunanut allanut ministeri Hillary Clinton ullumi taama oqarpoq. Nunarsuarmilu naalagaaffissuit pissaanillit pingasut akornanni isumaqatigiittoqarnera siornatigut pisimanngitsoq DR-ip Washingtonimi ilanngutassiortua Steffen Gram oqarpoq.

- Taanna pingaartorujussuuvoq Amerikallu avammut atassuteqarnerani ajugaanerulluni. Russit peqataatinneqarput atomimillu sakkussakillisaanissaq pillugu russit amerikamiullu akornanni nutaamik isumaqatigiissutip kinguneralugu, isumagissaartoqarpoq, Kinamiullu peqataatinneqarlutik, tassami Kinap peqataannginnissaa ajornartorsiutaassangatinneqaraluarmat. Tamanna Iranimi aqutsisut tatigineqannginnerannut ersiutaavoq aammalu Iranip aatsaat taama sivisutigisumik immikkoortinneqalerneranut ersiutaalluni, Steffen Gram oqarpoq.

Akerlilersuilluni sakkortunerusumik killilersuisoqalissanersoq aammalu killilersuinerit taakkua qanoq siunertaqarnersut erseqqinnerusumik nassuiarneqarsinnaaneri Steffen Gram aperineqarami akivoq:

- Immikkoortitaarneri naluavut, kisianni immikkut paasisimasallit maanna oqarput Korea Avannarlermut pillaaniutinut atulersinneqarsimasunut assingusuussasut, tassalu nioqqutissat amerlaqisut Iranimut nioqqutaassanngitsut nassiunneqartassanatillu, imaassinnaavorlu umiarsuit Iraniliartut unitsinneqartalissasut misissuiffigineqarlutillu. Taavalu Iranimi pissaanermik tigumiartunut aningaasaqarnikkut killilersuinerit sakkortunerulissapput, siullerpaamik sakkutuunut pikitsitsiniartunut, tassa taakkuugallarput.

Kina Ruslandilu nutaanik killilersuisoqarnissaanut pinaakkaluarput, qanoruna pisoqarmat taakkua isumaqataalersimasut?

- Qanorpiaq pisoqarsimanersoq oqaatigiuminaappoq, kisianni tassa Amerikap avammut attaveqarnera Buship naalakkersuinerata nalaanut naleqqiullugu Obamap naalakkersuinerani allanngorsimasoq, allanngornerullu tamatuma kinguneralugu oqaloqateqartarneq Amerikamiullu oqaloqateqarsinnaanerat Iranillu tatigineqarsinnaannginnerannik takutitsisinnaanerat, tassa tamakkuupput inernerineqartut, Steffen Gram naggasiivoq.