USA-p nunatsinni sakkutooqarfia nutartertariaqalerpoq.Assi: Inuit Ataqatigiit

USA-p Pituffimmi sakkutooqarfimmi ilaa nutarterniaraa

USA-p Pituffimmi sakkutooqarfitoqaa nutartertariaqalerpoq. Sakkutooqarfiulli nutarterneqarneratigut suliat allanngortinneqarnavianngitsut, nunanut allanut tunngasunut ministeri ilisimatitsivoq.

Pituffik sakkutooqarfittut ukiut 70-it matuma siornatigut atuutilerpoq.

Nutarterneqarnissaanullu maanna piffissanngorpoq.

Nunanut allanut tunngasunut ministeri, Jeppe Kofod, Folketingip Kalaallit Nunaat pillugu ataatsimiititaliaanut taama akissuteqarpoq.

- USA-p sakkutooqarfimmik ingerlaavartumik aserfallatsaaliisarpoq, assersuutigalugu silap pissusiata allanngoriartorneranut naleqqussartarlugu. Illummi atortullu pisoqalisimapput, nunanut allanut tunngasunut ministeri akissummi ilaatigut allappoq.

AAMMA ATUARUK Danmark USA-lu: Amerikamiut radarii Kalaallit Nunaanniittut amerlisinnaapput

Silap pissusiata allanngoriartorneranut naleqqussartoqarpoq, tamannali pillugu sukumiinerusumik nassuiaateqartoqanngilaq. Innaallagissiorfiup nutarterneqarnissaa ilaatigut pineqarpoq, assersuutigaluguli nukissiuutinik ataavartunik atuisoqalerniarnersoq oqaatigineqarnani. 

- Sakkutooqarfiup innaallagissiorfia dieseli atorlugu ingerlanneqarpoq pisoqalisimallunilu, USA ilisimatitsivoq, generatorillu dieselitortut nutaat atorneqalissallutik, atortunik ingerlaavartumik aserfallatsaaliinermut atatillugu taamaaliortoqarluni, Jeppe Kofod ilisimatitsivoq.

Sakkutooqarfiup nutarterneqarneratigut suliat allanngortinneqarnavianngitsut, nunanut allanut tunngasunut ministereqarfiup nalunaarutigaa.

Sakkutooqarfiup nutarterneqarnissaa kissaatigalugu, USA-p ataatsimiititaliami Kalaallit Nunaannit, Danmarkimit USA-miillu atorfilittanik ilaasortalimmi ataavartumi oqaatigisimavaa.

Ataatsimiititaliaq ukioq manna apriilimi kingullermik ataatsimiippoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl