USA-p Pituffik sumulluunniit atorsinnaavaa
Kalaallit danskilluunniit oqartussaasui amerikamiut timmisartuinut Pituffimmiittunut ikinissaminnut pisinnaatitaanngillat, aviisimi Dagbladet Informationimi taama allaaserinnittoqarpoq.
-Pentagonimit akuerineqaqqaartigata amerikamiut sakkutuuisa timmisartuinik misissuisinnaanngilagut, taama oqarpoq Pituffimmi danskit illersornissamut attaveqaataat, John Blågren.
Amerikamiut Pituffimmi tamakkiisumik nakkutilliisuunerat Folketingimut ilaasortap Lars-Emil Johansenip assut narrassimaarutigaa.
-Danskit uagut avaqqutiinnarluta amerikamiut isumaqatigiissuteqarfigisarpaat, taamaattumik Pituffimmi susoqartarnersoq ilisimasaqarfiginngilarput. Imaassinnaavoq timmisartut atominik sakkussianik useqartartut, imaluunniit parnaarussanik angallassinermut nalusatsinnik atorneqartartut, Lars-Emil Johansen aviisimut Dagbladet Informationimut oqarpoq.
Nunanut allanut tunngassuteqartut Kalaallit Nunaata nammineq aqussinnaagaluarpagit, Information naapertorlugu, timmisartut misissornissaannut pisinnaatitaanissamut Lars-Emil Johansen ingerlaannaq piumasaqaateqassagaluarpoq.
USA-p Danmarkillu Illersornissamut isumaqatigiissutaat 1951-imeersoq amerikamiut Kalaallit Nunaanni taamatut piginnaatitaaffiinik aalajangersaasuuvoq. Tassani ilaatigut allassimavoq, amerikamiut timmisartui killilersorneqanngitsumik "Kalaallit Nunaanni sumiluunniit silaannartaa qulaallugu timmisinnaallutillu missinnaatitaasut".
