USA-p Nuummi sinniisoqarfittaavata ammarneqarnerani akerliussutsimik takutitsisoqassaaq
Amerikamiut sinniisoqarfittaavat Nuummi aqagu atoqqaartinneqarpat akerliussutsimik takutitsisoqassaaq.
Eqqissisimasumimmi akerliussutsimik sisamanngornermi takutitsisoqarnissaa nalunaarutigineqarpoq.
- Nammineq aalajangiisinnaatitaanerput aamma siunissarput kalaallinit inunnit aalajangerneqarnissaa kinguaariillu tulliisa pisinnaatitaaffii arlaatigut innarlerneqassanngitsut USA-mut erseqqissaatiginiarparput, akerliussutsimik takutitsinissamik aaqqissuisoq, Aqqalukkuluk Fontain, oqarpoq.
USA-p Kunngeqarfimmut Danmarkimut aallartitaa, Ken Howery sinniisoqarfittaap atoqqaartinneqarnerani peqataassaaq.
Kenneth Howery USA-llu Kalaallit Nunaannut immikkut ittumik aallartitaa, Jeff Landry inuussutissarsiorneq pillugu ataatsimeersuarnermut, Future Greenlandimut peqataajartornertik pillugu ulluni makkunani Nuummiipput.
Jeff Landry USA-mi nunap immikkoortuani, Louisiana guvernøri nunatsinnit marlunngornermi unnukkut aallassaaq. Taamaalillunilu sinniisoqarfiup ammarneqarnerani peqataassanani.
Inuit Ataqatigiinnit Folketingimut qinigassanngortissimasup, Aqqalukkuluk Fontainip Amerikamiut tikeraarnerat isornartorsiorpaa.
- Jeff Landry Kalaallit Nunaannut Donald Trumpimit immikkut aallartitatut imminut qaaqquvoq. Kalaallinut innuttaasunut sunniiniarneruvoq, tamanna Kalaallit Nunaanniit akuerinngilarput, taanna oqarpoq.
Amerikamiunut inuinnarnut oqariartuut
Immikkut ittumik aallartitap nunarput aatsaat siullermeerluni tikeraarpaa.
Jeff Landryp oqarnera naapertorlugu “nutaanik ikinngutitaartoriartorluni” Nuummiippoq. Tamanna DR-imut sapaatiummat tikikkami oqaatigaa.
Aqqalukkuluk Fontainilli tamanna tamakkiisumik siunertaasorinngilaa.
Taassuma oqarnera naapertorlugu nunanit allanit siunertarineqartut oqaatigineqartunik siunertaqartuaannanngitsut nunatsinni misilittakkat takutippaat.
- Qallunaat qanoq pissusilersortarnerat uagut kalaallit nalunngilluarparput. Qanoq siunertaqarnerlutik oqaraangamik allamik isumaqartartut nalunngilarput. Oqaatsit kusanarnerat piinnarlugu taama oqaaseqartarput, Aqqalukkuluk Fontain oqarpoq
Taamaammat taassuma akerliussutsimik takutitsinermut tapersersuiartortoqarnissaa Amerikamiullu tikeraarnerannik naammagisimaarinninnginnermik takutitsisoqarnissaa kaammattuutigaa.
- Takutitsiffigerusutatta tassa USA-mi innuttaasut nalinginnaasut kalaallit innuttaasut namminneq aalajangiisinnaassuseqarnertik, tamat oqartussaaqataanerat kiffaanngissuseqarnertillu illersoraat takussagaat neriuutigaara. Taakku kinguaariillu tulliisa nammineq tunngavigisagut malillugit inuusinnaatitaanissaat illersortuaannassavagut, Aqqalukkuluk Fontain oqarpoq.
Akerliussutsimik takutitsineq Inatsisartut eqqaanni nalunaaqutaq 16.30 aallartissaaq, USA-llu sinniisoqarfittaavata tungaanut ingerlaaqatigiittoqassalluni.
