Tusarniaaneq pivoq, amerikami UFO-t pillugit nalunaarusiarsuaq qulequtalik "unidentified aerial phenomena" (UAP) qaammatit aqqanillit matuma siornagut saqqummiunneqareersorlu.Assi: Adriano Aurelio Araujo/flickr

USA-p kongressiani UFO-t pillugit immikkut ittumik tusarniaasoqartoq

USA-p illersornissaqarfiani qaffasissumik atorfillit marluk USA-p kongressiani UFO-nik hunnorujulikkaariarluni takunnittoqartarsimanera pillugu marlunngornermi tusarniaanermi peqataapput.

UFO-t, tassa avataarsuatigoortaatit nunarsuatsinneersuunngitsut (tuluttut: Unidentified Flying Object-it) pillugit qaqutigoortumik ukiullu 50-it kingullermik tusarniaasoqarneraniit ingerlareersut, USA-p kongressiani ippassaq marlunngornermi tusarniaasoqarpoq.

Nutaarsiassaqartitsiviit Reuters aamma BBC taama allaaserinnipput.

Tusarniaaneq pivoq, amerikami UFO-t pillugit nalunaarusiarsuaq qulequtalik "unidentified aerial phenomena" (UAP) qaammatit aqqanillit matuma siornagut saqqummiunneqareersorlu.

Amerikamiut sakkutooqarfiisa 2004-miilli 140-roriarlutik UFO-nik takusaqartarsimanerat nalunaarusiami uppernarsarneqarpoq.

AAMMA ATUARUK Forskere har opfanget 15 radiosignaler fra fjern galakse

Scott Bray sakkutuut imarsiortut pisortaanerata tullersortaa oqaluttuarpoq nalunaarusiap saqqummiunneqarnerata kingorna, UFO-nik uppernarsaaserlugit takusarnerit 400-nngorsimasut.

Atorfilittat tusarniaanermi apersorneqartut oqaluttuarnerminni oqaatsinik sunik atuinertik mianersuutigisorujussuuaat. Bray oqaluttuarpoq, UFO-t nunarsuatsinneersuunatik avataarsuaneersuusinnaanerat, illersornissamik isertortumillu paasiniaasarnermik misissueqqissaartartunit mattunneqanngitsoq.

Kisianni atortussiat qinngornerilluunniit takuneqartartut nunarsuatta avataaneersuunissaat uppernarsivinneqarsimanngitsoq Scott Bray aamma oqarpoq.

UFO-t pillugit tusarniaanermi videot marluk UFO-sorisanik imallit takutinneqarput. Tassani UFO-sorineqartup aappaa ammalortoq, sukkasoorujussuarmik timmisartorsuup siuani igalaat saneqqullugit timmisoq immiunneqarsimavoq. Taassumali suminngaanneersooqqissaarnera uppernarsimaneqarnikuunngilaq.

USA-mi UFO-t pillugit tusarniaaneq siulleq 1969-imi pisimavoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl