USA-p kitaani orpippassuit ikuallattut New Yorkimit takuneqarsinnaasut
Amerikap kitaani orpipassuit ikuallannerisa pujuat Amerikap kangiani iloqarfissuarmi New Yorkimi takunneqarsinnaavoq.
AFP silasiortut nalunaarusiaannut innersuussutigalugit taama allappoq.
Pujorli 6 kilometerisut qutsitsigisumiittoq nalunaarutigineqartoq.
Pujoq Amerikap kangiani Amerikap kitaanisulli akornutaatiginngilaq, pingasunngornerullu ingerlanerani siaruaanneqassangatinneqarluni.
AAMMA ATUARUK USA-mi inuit 100.000-likkuutaat angerlarsimaffimminnit qimagussorneqartariaqarsimasut
Amerikami naalagaaffiup Oregonip ajornartoorfiusutut nalunaarutigineqarnissaanik Oregonip guvernøriata Kate Brownsip noqqaasssutaa præsidentip illorsuanit Det Hvide Husimit akuerineqarpoq.
Tassa imaappoq, inuit ataasiakkaat illugisamik iluarsaatitinnissaannut aningaasatigut ikiorserneqarnissaminnut qinnuteqarsinnaalissapput, pigisaminnilluunniit sillimaserneqarsimanngitsunik annaasaqarsimagunik ikiorneqarsinaalissapput.
Californiami orpipassuit qaammat kingulleq ikuallalermata Oregon maannamut eqqugaanerpaavoq.
Naalagaaffinni Oregonimi, Californiami Washingtonimilu ivikkat orpippassuillu 1,8 million hektaritut annertigisut ikuallapput.
Illoqarfeerarpassuit eqqugaapput, angerlarsimaffippassuit aseruatiterput inuillu 34-t ikuallagussaallutik.