USA-p inatsisinik atuutsitsinermut ministeria: Qinersinermi peqquserluttuliortoqarsimaneranik takussutissaqanngilaq

USA-mi præsidentimut qinersinermi peqquserluttuliortoqarsimaneranik takussutissaqanngitsoq, USA-p inatsisinik atuutsitsinermut ministeriata William Barrip nutaarsiassaqartitsivimmut AP-mut oqaatigaa, qinersinermut inernernut allannguisinnaasunik peqquserluttuliortoqarsimannginnerarlugu.

Barr taama oqarpoq, naak USA-p maanna præsidentiata Donald Trumpip qasseerpassuariarluni oqaatigisarsimagaa peqquserluttuliortoqarsimasoq.

Naammagittaalliuutit, pasilliinerit paasissutissalluunniit aallaavigalugit eqqartuussissuserisut FBI-minngaanneersullu misissuisarsimasut Barrip AP-mit apersorneqarluni oqaatigaa.

- Qinersinermulli inernernik allannguisinnaasunik peqquserluttuliortoqarsimaneranik takussutissanik nassaanngillat, Trumpip inatsisinik atuutsitsinermut ministeriata oqaatigaa.

AAMMA ATUARUK USA-mi naalagaaffiit marluk Joe Bidenip qinersinermi ajugaanera aamma akuerigaat

USA-mi demokratit præsidentimut qinersinermi peqquserluttuliorsimasut Trumpip eqqartuussissuserisuata Rudy Giulianip, Trumpip qineqqusaarnermut ataatsimiititaliaa sinnerlugu oqaatigisarpaa.

Eqqartuussivilersuussinerit amerlasuut suliassanngortinneqarsimapput, suliassanngortitsinerilli itigartitsissutigineqarsimallutik, aamma republikanerit sinnerlugit eqqartuussisunit.

Eqqartuussivilersuussiniarnerit itigartitsissutigineqarnerisa kingorna præsidentimut qinersinermi ajorsarnini Trumpip nassuerutigisariaqaraa, naalagaaffimmi Pennsylvaniami republikanerit sinnerlugit senatorip Pat Toomeyp kaammattuutigaa.

Qinersinermi inernerit apeqquserlugit inatsisitigut allanngortinniarneqarnissaannut Trump periarfissaarutereersoq senatorip oqaatigaa.